وازغنون ها أوطيلاتك أش كيديرو. فندق ميركور ناضت فيه قتيلة كبيرة سلخو فيها لفيادر بيلوط ديال الطيارة وهرسولو الماشوار (صورة)

سياسة تفويت الاوطيلات ديال صندوق الايداع والتدبير للخواص باش يسيروها كاتجبد غير المشاكل والصداع، آخرها لي وقع ففندق ميركور فالناظور لي عطاه صندوق الايداع والتدبير لشركة أكور تسيرو، هاد الشركة لي بينات فشلها في التسيير وواقعين فضايح كبار داخل الفندق.
ومن بين الفضائح الكبيرة هي تنصيب كاميرات مراقبة داخل الملهى الليلي وهادشي لي ماكاينش فشي بلاصة أخرى وممنوع، والسبب حسب مصادر "كود" هو أن مالك الشركة لي ركبات الكاميرات قريب أحد المسؤولين، وكانوا باغيين يعطيوه يخدم ويدبر على صريف باللي كاين.
الملهى الليلي ديال الفندق لي تم إغلاقه، وقعات فيه قتيلة كبيرة بين أحد الحراس الخاصين "فيدور"، وبيلوط ديال الطيارة، هاد البيلوط لي شركتهوم شادة ليه فالفندق نزل للابواط ووقع بينو وبين الفيدور مشكل ناض هرسلو المشوار حي أثبتت شهادة طبية حصلت عليها "كود" مدة العجز في 90 يوما.
البيلوط ماباغيش يسكت على حقو وغادي يرفع دعوى قضائية على موالين الفندق يطالب فيه بتعويضات لأن الاعتداء عليه وقع من طرف أحد العاملين عندهوم وداخل الفندق لي كاري فيه.
في نفس السياق ديال فضائح تفويت الفنادق لشركات أجنبية باش تحلبها، علمت "كود" أن مجموعة كولدن توليب لي كان صندوق الايداع والتدبير باغي يعطيها 14 فندق تسيرهوم غارقة فالمشاكل مع المجموعات لي شادة ليهوم الاوطيلات، حيث علمت "كود" أن المجموعة العالمية من بعد ما مشاو ليها فنادق الشعبي وفنادق فرح رجعات شادة الفنادق الصغيورة آخرها كان فندق "رضا" في زاكورة لي ناضوا العمال ديالو كيحتجو ماباغيينش المجموعة تدخل تشد الخدمة حقاش فينما مشات كيجريو عليها.