في عيد المرأة !!: تعلمي ماتخافيش من جمالك راه جسدك ما كيلغيش عقلك

السؤال علاش ماكينش عيد الرجل ؟ ؟ حسيت بحالا كايقولو لينا تانتعاملو معاك على قد عقلك ، هاكي وردة اليوم وغدا نخرجوها منك !! او بحال داك الدري الصغير اللي تايشريو ليه حوايج العيد وملي تايجمع الصرف ويكون فرحان بالفلوس وتايحلم يشري الفانيد ، تايقولو ليه آرا نخزنوهم ليك وماعمرو تايبقى يشوفهم …
عيد تانشوف فيه الضحك على عقولنا ماشي تكريمنا … ولا نقوليكم فعلا راكم كرمتونا في الشمس وطحنتونا ماشي كرمتونا التكريم اللي نستحقوه …
عيد استهلاكي !! بيعو الورد وبيعو الهضرة وبيعونا معاهم في سوق النخاسة …
العيب ماشي كلو على الرجال العيب حتى على المرأة عدوة المرأة ….
نعم المرأة هي اللي تاتقول للبنت ايلا ضربها خوها وخا صغر منها هو راجل ، و مايشقاش حيت راجل ، ويخرج ويتسارى وانتي تبقاي في الدار حيت راجل ، و سعدي وفرحي بسيد الرجال وانتي غير امراة ….
وزيد عليهم حتى اللي دايرين فيها حداثيات ومثقفات ، واللي محيحين على حقوق المرأة ، وملي تشوفك لابسة ميني ولا شورط او صدرك عريان تقوليك الحرية ماشي هي التعري الحرية في الراس ، و دوي معاها ضربك بروصية للفم ، أو حاولي تناقشي معاها ماتعطيكش وقت لسماع رأيك لأنها تاتقول انتوما اللي تاتخليو الرجال يشوفوا فينا كسلعة … هاناري على تهمة يا أختي يا اللي دايره فيها فاهمة وواعية . كوني مثقفة أو أنادي بالحرية ماشي بالضروري نلبس سروال ونجمع شعري وندير نضاضر باش نعطيك الانطباع أني ماشي سلعة ، وماشي ضروري ندير كرافطة باش تعرفي من شكلي أنني أدافع مثلك على حقوق النساء ، المظهر عمرو ماكان تايوحي بالثقافة من عدمها وعمر الفكر ما كان تايلغي الأنوثة ….
مافيها باس ملي نكون باغا نقرا كتاب ندير ماسك لوجهي ، ونهتم بضفاري وشعري وأنا تانتفرج في وثائقي على السياسة والمجتمع ، وكانظن ماشي مشكل إيلا لبست وتأنقت فكرا وشكلا وملي نشوف في المراية نفرح براسي انثى جميلة مغرية من أجلي أنااااااا وفي نفس الوقت عندي عقل وفكر يحير الرجال ويفقدهم توازنهم شكلا و موضوعا …
لأن الإنسان ( امرأة او رجل ) السوي الخالي من العقد مهما بلغت مرتبته تايبغي يحس أنه مرغوب فيه من الجنس الآخر وكانبغيو نسمعو الإطراء عادي شحال من راجل تايبغي يسمع أنت مثقف وزوين وأنيق ماشي ضروري يكون مشعكك و ريحتو تاتقبس بالكارو مشط شعرك اسيدي و دير بارفان …
وشحال من إمرأة كاتبغي تسمع أنها غزالة ومثقفة حتى المنقبة اللي تاتخفي جمالها تاتبغي تسمع اطراء على دينها وورعها وتقواها ..
ولا عيب في ان تكوني جميلة ومثقفة …
ونساو قول شارل بودلير ( كوني جميلة و اصمتي ..) لا اسكت أنت نيت أنا من حقي نكون جميلة ونهضر ونفكر ونكتب ونرقص ……
تعلمي ماتخافيش من جمالك و جسدك لأنه لن يلغي عقلك ، العقل في بلاصتو والزين في بلاصتو ….
رسائلي للكبار فهما لا الكبار سنا .
الله يجيب اللي يفهمنا ولا يعطيناش .