داعش اللحى المشذبة: واش باغي بوليف وبحالو يردونا للقرون الوسطى ويدير العمرة فجائزة علاش ما يدبرش علي فكوبا كابانا باش نضرب الطاسة ونتبرع فالساطات

لا حديث هذه الأيام إلا عن العتاد العسكري لي ثم نشره في المدن المغربية، وكل واحد آش كيقول الموهيم الإجماع كان هو تهديد ارهابي قادم من سماء ليبيا جيهة عين الذياب، الحمد الله حتى حنا عندنا الصوارخ والجيش ديالنا راه توحش الكيرة، وموحال يهرب كيما دار جيش العراق.

ولكن واش بصح حنا مهددون فقط من دواعش السماء، على هاد دواعش الأرض لي بيناتنا واش ماشي تهديد.

شحال هادي كنا كنقولوا على المتأسلمين، سنيين وخوانجية، ومن بعد ولاو سلفيين ولحايا، ودابا راه كولشي كيقوليهم داعش، وهاد اللقب مكيعنيش انتمائهم الى دولة الإسلام في العراق والشام، وإنما كيعني نسبهم للخوانجية لي باغين يردونا للعصر الحجري.

موت الطالب المزياني خلف إستياء عند البعض وطبعا استغله اليساريون والحقوقيون للتجارة في دمه والمزايدة به، وشي خوانجية الله يهديهم اعتابروه عقاب من الله في الدنيا قبل الآخرة، وإنتقام الهي لموت الطالب الحسناوي، هاد التصريح الداعشي قاله حسن حمورو لي قالو أنه مسؤول التواصل في حزب لامبة، ولي داير اشارة ربيعة كصورة بروفايله الشخصي.

أما محمد الهيلالي القيادي فالجناح الدعوي لحزب لامبة التوحيد والإصلاح، فقد قال:"القاتل دائما يستحق لعنة الله في الدنيا حتى إن عجل له ربه جزاءه في الدنيا قبل الآخرة".....هادا خرج ليها طاي طاي وإستبق حكم المحكمة واعتبر أن المزياني قاتل قبل أن يدينه القضاء، وتشفى في موته بل زاده من عنده لعنة الله. والمشكلة أنه لم يكتفي بهذا بل بغا يمنطق هادشي حيث قال:

:"عندما يقتل إنسان إنسانا، ويرتمي القاتل في حفرة ليهرب، ثم يلقى حتفه كيف تكون العلاقة بين الأول والثاني ومن الضحية ومن الجلاد؟""

بحال هاد التصريحات لداعشيي الداخل كتخلعني أنا بعدا، أواه توصل بيك الجرأة لأنك تتشفى فواحد مات بالعرض البطيئ، هادشي راه معندهم جهد لتحقيق عدالة الأرض لذا انتظرو عدالة السماء، أما كون كانت عندهم القدرة على الإنتقام فالأرض كون نتاقموا لمقتل الحسناوي هنا.

سي وزير العدل لي عرف بتبنيه لقضايا اللحايا حتى المضربين عن الطعام منهم، هاد المرة وبحكم أنه أصبح من موالين العرس، قاليك أسيدي أنه كال على الطالب سلوك مسلك احتجاجي آخر غير الإضراب عن الطعام، وقاليك هاد السلوك راه حرمته الشريعة الإسلامية، حيث سي الرميد حاسبنا مسلمين كلنا وصحة وأننا ملزمون بإتباع الشريعة الإسلامية قبل منكونوا ملزمين بإتباع القانون، وزاد قاليك أن هاد سلوك قتل النفس راه داعشي، وأنه كاين بيناتنا شلا داعشيين انتحاريين بحال المزياني، بشكل هادشي عند سي الرميد علاه كاين شي تقدميين داعشيين.

أما سي لوزير بوليف (مرشح الحومة)، قاليك باش يشجع السائقين يردو البال فالطريق ويلتازموا بقانون السير دارليهم حوافز وجوائز، ومنها عمرة لمقام الله والنبي، بحال هاد الجائزة تعجب الواليدة عندي، والى ربحاتها ومشات غادا تدعي معايا بالهداية وتدعي مع بوليف بالرحمة والخير والبركة، وملي ترجع غادا تصوت على العدالة والتنمية علما أنها كتصوت عليهم بلا ميديوها للعمرة، ولكن راه المغرب ماشي كامل بحال الواليدة راه فيه حتى أنا، علاش زعمة هاد اعتبار ضمنيا أن المغاربة كلهم بحال الواليدة، وعلاش هاد المجازاة بالعبادات، واش باغين يردونا للقرون الوسطى ولإيامات صكوك الغفران، سوق مزيان تربح عمرة تغسل فيها ذنوبك، مثلا ألى ربحت أنا آش غادي ندير بشي عمرة، واش زعمة مايقدرش يبدليا سي لوزير الجائزة بتسافيرة فاعلة تاركة لتايلاند أو الرأس الأخضر أو جزر المالديف باش نضرب الطاسة ونتبرع فالساطات ونتفرج السريبتيز، راه حتى أنا مغربي مال سي لوزير مافكرش فبحالي وعوض مايدير الجائزة عبارة عن صك للغفران تقضيه فالسعودية يدير خيارات أخرى بحال رحلة لأحد شواطئ العراة بالجنوب الفرنسي، أو لشاطئ كوبا كابانا فالبرازيل، أو للمكسيك نشربو بيرة كورونا عوض نجيبوا فيروس كورونا من السعودية.

بالنسبة ليا هاد التدعيش واخا لحدود الآن باقي لايت ولكن راه هو الخطر على الحريات العامة والفردية فالمغرب، والى كنا غنديرو الصوارخ فلاكوط ونحضيو الخطر القادم من السماء، فراه مخاصش ننساو الخطر لي معشش معانا هنا، ولي كل نهار كيبين على وجهوا الحقيقي، واخا لحى هؤلاء دايز عليها الطوندوز ومشذبة مقارنة بلحى إخواننا بداعش فراه مكاينش شي فرق كبير، راه هاكة كتبدى صغيرة وغادا وكتكبر.