ردوها دولة علمانية و ديك الساعة غادي يكون عندكم الحق لا تشكيتو من الزفزافي لي كايدخل الدين فالسياسة !

—
من العيوب لي لقاو مجموعة ديال الحداثيين فالفايسبوك للحراك ديال الريف هوا " استغلال الدين في السياسة" حيت كايشوفو الزفزافي كايكثر من قال رسول الله و بسم الله الرحمن الرحيم و اليوم فاش شافوه دخل للجامع وقف صلاة الجمعة و خدا الميكرو للخطيب جهلو وخرجو كايغوتو " واك واك هادشي خطير استغلال الخطاب الديني فالسياسة "
و فجأة و لا كلشي كايبان ليه المغرب دولة علمانية ! خاص يتفرق فيها الدين على السياسة !
وي ! الزفزافي كايستاغل الدين فالسياسة ! و هادشي نورمالمو ماخاصوش يكون
و لكن ماشي بوحدو…
الدولة أول وحدة كاتستاغل الدين فالسياسة ! و فالاقتصاد و فالحياة العامة ! علاش فاش كاتخرج الدولة ممثلة في مؤسساتها و وزراءها و ولاة و عمال باش يديرو صلاة الاستسقاء و يطلبو الشتا من الله هذا ماشي استغلال للدين فالسياسة؟
علاش فاش كايتصورو البرلمانيين ديالنا و الوزراء يامات الحملات الانتخابية ساجدين و لا راكعين وسط شي صالون فوق شي زربية رباطية و كايلوحوها فالفايسبوك باش يشوفها الناخب المغربي ماشي استغلال للدين فالسياسة ؟
علاش فاش كايوقف بنكيران و يستشهد ببن تيمية و يعمر الخطابات ديالو بقال الله قال الرسول ماشي استغلال للدين فالسياسة!
ايوا باراكا علينا من النفاق ! الاستغلال ديال الدين كاتمارسو الدولة أشخاصا و مؤسسات ! من مول التليفونات لي حاط طبلة فدرب غلف و داير اللحية باش يبان راه ماكاينصبش على عيباد الله ! حتى لرئيس الحزب الفلاني و لا العلاني لي كايتصور ساجد مسكين ! زعما راه مومن و ديال الله باش يصوتو عليه فالانتخابات!
دابا خاص الدولة و مثقفينها يكونو واضحين مع راسهم حيت ماكاين ماحسن من الوضوح و المعقوووول هوا لي كايدوم، واش بغيتوها دولة علمانية؟ نديروها علمانية و ديك الساعة تاواحد ماغايكون عندو الحق يستاغل الدين و لي عندو شي خطاب ديني يشدو عندو و يعطينا الخطاب الحقيقي ! و الدين غايولي داخل فالحياة الخاصة للأشخاص و سدات مادام! و لا بغيتوها دولة دينية !؟ و ديك الساعة ماتجيوش تشكاو حيت خصم سياسي ديالكم استغل الدين فالخطابات ديالو و بيناتكم آ بيضاوا !
أما هاد الضبابية لي كاتعامل بيها الدولة مع الدين راها ماشي فمصلاحتها ! و فالمستقبل غادي ضرها اكثر ماغادي تنفعها
و يمكن جا الوقت باش هاد النقاش على العلمانية يبدا بطريقة جدية…