اعتقال الزفزافي وحراك الريف كيبين باللي كاينة ازمة غير المشكلة عندنا حكومة منعدمة الشعبية ما كيتيقوش فيها لمغاربة

كاين معتقلين فالبلاد نتيجة قيامهم بإحتجاجات سلمية من أجل مطالب مشروعة ، كاينة احتجاجات فالبلاد متفاوتة الحجب حسب المناطق ، كاينة خرجات تضامنية مع معتقلي الريف فعدة مدن والبعض منها كلاو لعصا وتجمعوا عليهم البلطجية سلخوهم وسبوهم ، كاين صحافة دولية وقنوات كيدويو على اعتقال الزفزافي وحراك الريف ، كاينة الأزمة ، كاينة حكومة منعدمة الشعبية أغلب المغاربة مكيتيقوش فيها ومكيعرفوش أكثر من نصها ، هادشي كامل كاين وأكثر وتنوض تقرى أن المالكي وافق على شراء أيفونات وطابليطات للبرلمانيين في كلا الغرفتين ، بحال الى مكافيش هادشي لي كيعيشوا المغرب هاد ليام حتى يتزادنا مثل هاد الخبر المؤلم ديال صفقة بالملايين تمشي هكاك هباء منثورا لصالح برلمانيين الشعب فاقد الثقة فأغلبهم ، ولحد الآن لا أثر لهم فالساحة السياسية والإجتماعية.
كاين لي غادي يقوليك هادي مزايدة شعبوية وأن البرلمانيين كمشرعين خاص توفر ليهم الدولة الظروف الملائمة لمزاولة عملهم ويبقاو بعاد على الأغرائات ، هادشي بصح فالدول لي فيها برلمان حقيقي عندو قيمة ومصداقية فالمجتمع ، أما برلمان بحال ديالنا لي مخلطة فيه حكومة ومعارضة ومتعرف الفرق بيناتهم ، لي فيها أحزاب متشابهة أغلبها همه هو المشاركة فالحكومة ، برلمان لي كل مرة كيظهر تورط أحدهم فشي فضيحة ، برلمان لي كيشرع لقوانين كتزيد تقيد من الحريات ديال المغاربة وتهكلكهم ، برلمان لي مصوت ضد الزيادة فميزانية التعليم ، هادشي كامل بالإظافة الى شهور ديال الراحة المدفوعة الأجر ، ويزيدوهم آيفون من الفوق ، لا هادا حقا خبر مقود وكيزيد يخلينا نفقدوا أخر ذرة شك بلي أن هاد الدولة ومسؤوليها ومنتخبيها راهم كيحتارمونا كشعب مقودة على دين مو وعلى سبة.
راه هذا هو الموشكيل هو ملي كتشوف أغلبية الشعب كتفتاقر للعيش الكريم ومقودة عليها ، وفنفس الوقت كيتم صرف هدايا بميزانية كبيرة لفائدة ممثلي الشعب لدى الحكومة ، والموشكيل الأعمق هو كيفاش كتدوز مثل هاد الصفقات وعلاش آيفون ماشي أوبو أو ماركة خرى ، وحاليا ملي ردوهم العديد من البرلمانيين فين غادي يمشيو هاد المشاقف واش غيرجعوهم للشركة ولا غيبقاو غير محطوطين وفلوسهم مشات ، راه عبث فعبث هادشي والى كاين شي حاجة حاليا فالمغرب ميعة الساحة السياسية وخاص نثورو عليها فهي الأحزاب السياسية لي بينات فالعديد من المراحل أنهم أعداء للديمقراطية والبلوكاج الحكومي خير دليل .