المونديال 2018: " نتأهلو من أجل الروسيات".

—

كاين مغاربة (الأغلبية) لي باغيين يتأهلو لمونديال 2018 حيت طالعة دابا فعشرين عام ما شاركنا فيه، من يامات العز د حجي وبصير و الحضريوي ف 1998. وكاين واحد النوع وحداخور لي باغي المغرب يتأهل غي باش يمشي لروسيا بلا فيزا يدير "الفتوحات الفرجية" مع الروسيات.

هاد النوع التاني، النوع ديال "نشدها نمحنها" كائن خاصو يتدرس ويتحلل، باش نفهمو شنو لي كيخليه يفكر بهاد الطريقة؟ واش هادشي جيني؟ واش ترابي؟ واش المناخ؟ واش شي فيروس؟
حيت لاجينا نديوها على الهدرة ديال "المغربي الفحل" راه العيالات المغربيات كلهوم فرحانات، عاجبهوم الحال، راضيات ومكتافيات جنسيا، وهو لا شعلنا غي الراديو واحد السويعة كنسمعو بلي بوجمعة من سبت كزولة كينعس مع مرتو مرة فالعام، خديجة من حد السوالم عمرها جابتو، بوشعيب من دوار قلوشة عندو مشكل فالإنتصاب، الضاوية من كرسيف راجلها غي كضحك معاه كيجيبو… وزيد وزيد من مشاكل جنسية لي عندنا حاضرة وكثيرة فالمغرب.

حسب واحد الإحصائيات كان دارهوم مكتب الدراسة الفرنسي "هاريس التفاعلي" لشركة " فايزر" لي كتصنع الفياكرا، فالمغرب 33% ديال الرجال لي راضيين على العلاقات الجنسية مع الشركاء ديالهوم و غي 23% ديال العيالات لي عاجبهوم الحال ولقاو بلي السبب الأساسي هو مشكل الإنتصاب. هادو ارقام كاريتية، كتخلع و كتبين على شحال مقودة على المغربي جنسيا، ولي قود هو معمرنا كنهدرو على هادشي لا فالإعلام ولا بيناتنا، غاديين نادهين بحالا كلشي بيخير! الرجال غالطين فراسهوم والعيالات كيكذبو ويمثلو.

ولكن لا، واخا هكاك، "ناتاشا" و "اناستازيا" و " كاتيا" كيتسناو 2018 بالريق الناشف باش يجي يفزكهوم عبد النبي و عبد الله وعبد الباسط حيت الرجال الرواسا ما فيديهومش مقارنة مع المغاربة، مكيعرفوش يمحنو ويحردو ويسخسخو! وهادشي الروسيات معلوم عارفينو (اختي الروسية، نصيحة: هاد النوع من المغاربة قادر يمحنك فأي لعبة الا فالجنس).

شخصيا، كنقتارح على سي بوتين يصيفط لهاد الماركة لي كيسحابلهوم بلي الروسيات راه شيطات وغي غيحطو رجليهم فروسيا غيتلاحو عليهوم، شي 1000 عسكري يكونو هازين معاهوم الكلاشنيكوفات ديالهوم باش يتلقاو ليهوم ويردو باباهوم من باب المطار.