10 احداث هزات راسنا ف2017: طلعنا قمر صناعي وجبنا كأس افريقيا ومشينا لروسيا وحيحنا فمحاربة الارهاب وتحركنا مزيان فافريقيا ورجعنا لاتحادها وقربنا من سيدياو

تقدم "كود" 10 احداث هزات راسنا كمغاربة هاد العام. طبعا غاديين نديرو 10 احداث اخرى ف2017 حشماتنا. نبداو بالايجابي اولا
1 ///
المغرب يعود الى افريقيا
بعد سنوات طويلة وبعد خدمة مزيانة عاد المغرب الى الاتحاد الافريقي في قمة اثيوبيا. الملك محمد السادس طبق استراتيجية كبيرة مفكر فيها. عودة غادية تكون مفيدة للرباط مفيدة لقضايا المغرب
2///
طلقنا قمر صناعي وسبقنا الجزائر
اطلاق القمر الصناعي قبل نهاية السنة من طرف المغرب واسمه "محمد السادس" خلى المغرب يسبق خوتنا الجزائر وحتى اسبانيا. هاد القمر اللي شرفات عليه ظاهريا الوكالة الوطنية للمحافظة العقارية والمسح العقاري والخرائطية غادي يفيد امنيا بشكل كبير للمغرب. غادي يدعم المغرب شركاءه الافارقة. غادي يساهم فحمايتهم. هاد المبلغ اللي تخسر عليه ولو لمدة خمس سنين غادي يفيد المغرب بزاف
3///
الترشح لدخول سيدياو
التوجه الافريقي للمغرب خدا اشكال كثيرة. ماشي غير الاتحاد الافريقي اللي دخل ليه المغرب. عبر عن رغبته في الدخول لتجمع دول غرب افريقيا. هاد الاتحاد مهم بزاف. طبعا القمة الاخيرة في نيجيريا ما داولتش انضمام المغرب بسبب اعتراض دول وتخوف اخرى من هيمنة اقتصادية للمملكة على هذا التجمع. لكن اخبار المغرب سيدياو بانه قابل يتخلى عن عملته الدرهم مقابل عملة موحدة خطوة غادية تغير اقتصاد المغرب
4///
القمة الافريقية الاوربية بالبوليساريو
حدث تاريخي احتضناتو ابيدجان بالكوت ديفوار قبل اسابيع يتعلق الامر بالقمة الافريقية الاوربية. كانت على الهجرة واللي خدا كلمة الافارقة هو المغرب. كيجني سياستو مع المهاجرين اللي بداها هادي مدة. المغرب فرض راسو كاهم محاور في افريقيا واوربا. قضية الهجرة خاصها دوز على الرباط. هاد القمة شهدت حدث اخر غير مسبوق. محمد السادس ملك المغرب في صورة جماعية مع ابراهيم غالي للي حضر كرئيس للجمهورية الصحراوية =المعلنة من جانب واحد=. زعيم البوليساريو فرح بوجودو واخا هاد الصورة ما غادية تغير والو فالوضع
5///
التآهل الى كآس العالم
هاد العام ابيدجان كانت فال حسن على المغرب ماشي غير فالسياسة حتى فالرياضة. المنتخب المغربي لكرة القدم وبعد سنوات طويلة من الغياب يفوز على الكوت ديفوار بميدانه بهدفين لصفر في اخر مباراة عن الاقصائيات المؤهلة لمونديال روسيا 2018. نجوم رونار حيحو ومعاه دخلات فرحة عامرة للمغاربة. عاود اكتشفنا لذة الانتصارات مع جيل من اللاعبين غالبيتهم العظمى من ابناء مهاجرين وعاشوا فاوربا وحملو جنسيات تلك الدول واختارو اختيار القلب المغرب. هاد الشي وقع فزمن رئيس جديد للجامعة مختلف عن سابقيه. هو فوزي لقجع. كيشبه لراسو ودار خدمة مزيانة عطات اكلها
6////
المغاربة للخليجيين: ماشي بحالكم
كان الخليج اخطر ازماته منذ تاسيس تجمعه. السعودية والامارات قرروا بدعم امريكي =ترامب= عزل قطر نهائيا. دول كثيرة تبعات السعودية. المغرب اختار يشد لعصا من الوسط. انا ماشي بحالكم. كنرفض تكون تابع. هادي هي رسالة المغرب. محمد السادس كان الزعيم الوحيد اللي قدر يمشي من الامارات الى قطر فالطائرة فهاد الوقت. حضر لافتتاح لوفر ابو ظبي وطار للدوحة ودار فيها وفشوارعها. قبل هاد الشي كان نقل مواد غذائية لهاد الدولة باش حاصروها جيرناها الخليجيون
7///
الحموشي محيح بلا ضجيج
عبد اللطيف الحموشي مرة اخرى كيبين باللي شخصية غير عادية. بيه المغرب دار هاد العام ديبلوماسية لحماق. انتقل من دول كثيرة ففرنسا فبلجيكا فاسبانيا فروسيا وفالشيشان فالكوت ديفوار وفرواندا فمالي. كلشي كان كينقل ليهم التجربة المغربية فمحاربة التطرف. اشرافه على المخابرات الداخلية =مديرية مراقبة التراب الوطني= خلات المغرب ينجو من هجومات لدواعش. فكك عدد كبير من الخلايا. لعب دور كبير كذلك بصفته المدير العام للمديرية العامة للامن الوطني فتخليق جهاز كان مريض بزاف بزاف. بدينا معاه نشوفو الشفافية الحكامة التدبير العقلاني. قطع لشفارة كثار رزقهم وتابع اللي زاغ على الطريق وغير كسوة البوليس ومعاه البوليس خدا ترقيات بشكل ما عمرو كان. هاد الشي كولو دارو فصمت. الدق فالخدمة والسكات
8///
ياسين المنصوري: الاقتصاد معركة ديبلوماسية
رجل اخر فالمخابرات وهاد المرة الخارجية تحرك بزاف بزاف. يتعلق الامر بياسين المنصوري باطرون لادجيد. هو رجالاتو خدمو مزيان اولا فتحسين صورة المغرب خارجيا لكن قوة هاد الجهاز انو خدم بزاف بزاف الاقتصاد. الديبلوماسية الاقتصادية. هاد الشي ديال انبوب الغاز والعلاقات والاتفاقيات مع الدول الافريقية والتحرك الديبلوماسي لكبير للمغرب تم بفضل رجالات المنصوري. اللي مساكن ما كياخدوش حقهم بزاف ولكن محمرين وجه المغرب
انبوب الغاز اتفاقيات مع اثيوبيا ودول اخرى
09 ////
الوداد هزت راسنا فافريقيا
الوداد البيضاوي محمرات وجه المغرب بفوزها بعصبة الابطال الافريقية. الوداد ربحات الاهلي المصري. التصرفات الهاوية لرئيسها الغبي سعيد الناصري حرماتو من مشاركة مشرفة في كأس العالم. لكن الانجاز الافريقي بمدرب مغربي الحسين عموتة كان انجاز كبير
10 ///
التخلص من روس وبان كيمون
الصحراء شهدت احداث كثيرة وبزاف منها فصالح المغرب. مشى بان كي مون وجا امين عام جديد البرتغالي غوتيريس. مشى الممثل الشخصي السابق المكلف بالصحراء كريستوفر روس وجا الالماني كوهلر. المغرب بدخولو لافريقيا قطع الاوكسجين على الجزائر. اللقاء التاريخي بين رئيس جنوب افريقيا زوما والملك محمد السادس فابيدجان اخيرا زاد فعزلة الجزائر وغادي يكون عندو دور كبير فتراجع البوليساريو اللي بغى يواجه هاد الشي بتحريك قواته وقيامه بمناورات قبل اسبوع