اخنوش عطى صورة ايجابية فاول ظهور تلفزيوني ليه. مؤدب حتى فهجومو حتى اللي انتاقدو وعارف فين غادي ومتواضع ومتفاءل وما بانش بحال شي سياسيين اللي كيشبهو لزعيم عصابة فتهديدهم فوعيدهم

في اول ظهور تلفزيوني لعزيز اخنوش رئيس التجمع الوطني للاحرار وزير الفلاحة والصيد البحري والتنمية القروية كان مزيان. رئيس الاحرار اللي استاضفو عبد الله ترابي فبرنامجو “حديث الصحافة” على دوزيم” هاد الليلة كان مرتاح الى كبير. البرنامج شارك فيه محمد بلقاسم من “هسبريس” ومهدي مشبال من “تيل كيل”. اخنوش ما بانش منرفز ولا سوق لغة الخشب. كيجاوب بدقة بلا زيادة بلا حشو.
حتى فانتقادو لمن هاجموه بحال ردو علي تصريحات عبد الاله بنكيران رئيس الحكومة السابق في لقائه مع الشبيبة واللي هاجمو٬ اختار اسلوب قاسح وظفو فلغة مهذبة وقال باللي كيخدم مع العثماني =رئيس الحكومة= حقاش ما عندوش ازواجية الخطاب٬ في اشارة الى سلفه بلا ما يجبدو بلا ما يذكرو
فالحوار بان اش باغي. عينو على رئاسة الحكومة سواء ف2021 او قبل ما تكمل الحكومة ولايتها. موجد كلشي. موجد العرض السياسي موجد البرنامج. موجد الموارد باش يطبق هاد البرنامج. الموارد البشرية بالاخص.
اخنوش دافع على جمعو المال والسلطة =الحكومة= وقال باللي من حق رجال الاعمال الاهتمام بالسياسة حقاش ماشي مهنة وكاع المواطنين من حقهم الاهتمام بالشأن العام. رد على تشبيه حزبو بالبام اي كيؤدي نفس الدور اللي لعبو هاد الحزب وفشل فيه فاخر انتخابات. حاول هنا يجبد شرعية شعبية من خلال استحضار والده حماد اولحاج. استحضار مساره السياسي. صورة والده مع المهدي بنبركة رسالة لخصومه. راني ما جيتش من عدم. راني ولد حماد اولحاج.
فكافة دقائق البرنامج الستين كان كيتكلم بامل بتفاؤل. بان مختالف جذريا على شي سياسيين هم اقرب الى زعماء عصابة منهم الى حزبيين. لغتهم التهديد والوعيد. اخنوش نجح فمرورو. عطى طاقة ايجابية من خلال كلماته من خلال طريقة اجوبته من خلال حركاته من خلال تفاعله مع الاسئلة. بان ولد الناس