منطقيا راه مايمكنش نشجعو الاعمال المغربية غير حيت مغربية بلا منقيمو الجودة ديالها، والأنترنيت كيبقى مجال مفتوح قدام أي واحد بغا يقدم البديل لكن للاسف ولي مابغاوش يفهموه بزاف هو أن العديد من المغاربة مابغاوش البديل

مسلسل سامحيني سنوات هادي وهو معشش فالتلفازة المغربية ومع ذلك باقي المغاربة كيتفرجوه بالملايين وشي حلقات منو حققات أرقام قياسية ، والموشكيل أنه ماشي غير فالتلفازة بل حتى فاليوتوب الحلقات ديالو كيتشافو بزاف، ومع ذلك باقي كتلقى شي واحد كيحل فمو ويتشكى من المسلسلات التركية وردائتها وكيفاش أنها بدون مستوى وخاص نشجعو الأعمال الوطنية ، واش عرفتي شناهي بنادم يولي يقلب على سامحيني فيوتوب ، يعني راه كيمشي للبلاصة فين الخيارات بمئات الالاف وفين كاين المسلسلات من كل الجنسيات ديال العالم والعديد منهم مترجمين للعربية ومع ذلك يلح إلحاحا أنه يخلي هادشي كامل ويطلق سامحيني ويضيع الكونيكسيون على كمال ومنار لي خمسنين هادي وهوما كيتعاودو.
إذن هنا الخلل ماشي فالمحتوى الأجنبي بل فالمحتوى المغربي لي مقدرش يكسب المتلقي المغربي حتى فالأنترنيت لي المنافسة شريفة فيها نوعا ما ، كنا نقدرو نعتابرو أن القنوات بصح كتكلخ الشعب بدوك المسلسلات وفنفس الوقت كتهمش الإنتاج الوطني ، ولكن ها الأنترنيت مفتوحة وقلب تلقى ، ومع ذلك المغاربة كيمشيو لداكشي لي كاين فالتيليفزيون بل بزاف ديال الناس اليوتوب بالنسبة ليهم غير امتداد لآش كاين فالتلفازة كيتفرجو فيه غير شنو زكلو فالتلفازة ، راه هنا فين كاين الموشكيل راه التلفازة مكتطورش الذائقة الفنية عند الناس بل الناس من خلال تفاعلهم مع محتوى معين كيساهمو فالإنتشار والنجاح ديالو ، راه حتى فبلدان خرى والبلدان العظمى عندهم الهراء فالتلفازة وكن فالنفس الوقت عندهم خيارات أخرى .
شتي كون كان مثلا اليوتوب المغربي مكيشبهش للتلفازة كنا نقدرو نقولو المغاربة بصح باغين البديل وكيقلبو عليه وكاين عزوف على مشاهدة القنوات الوطنية ، ولكن مادام المغاربة كيتلقاو الهراء لي كيدوز فالتلفازة بكل فرح ، بل وكيمشيو يقلبو عليه فالانترنيت فهادي حاجة خرى ، وهنا الموشكيل ماشي فالقنوات بوحدها بل حتى فالمتلقي ، ومنطقيا راه مايمكنش نشجعو الاعمال المغربية غير حيت مغربية بلا منقيمو الجودة ديالها، والأنترنيت كيبقى مجال مفتوح قدام أي واحد بغا يقدم البديل لكن للاسف ولي مابغاوش يفهموه بزاف هو أن العديد من المغاربة مابغاوش البديل وطل غير على الفيديوات الشائعة فيوتوب تعطيك الخبار.