هادا خاصو جواب اليوم دابا ديال النيابة العامة. الزفزافي فالمحكمة: امني خشى صبعو فدبري ولاخر دخل لعصا وبغيت نعرف مصير التحقيق فالفيديو

تصريحات ناصر الزفزافي زعيم حراك الريف البارح فالمحكمة خطيرة وخطيرة للغاية. المحاكمة حضراتها منظمات دولية وبلا هاد المنظمات كاع٬ راه المغرب كيقول دخل لدولة الحق والقانون يعني خاص رد من النيابة العامة. خاص جواب خاص بيان. داك الشي ماشي اي كلام راها محاكمة لزعيم حراك الريف وكلشي المغاربة عارفين الجرح اللي خلاه الحراك. لمغاربة كتاشفو ان النزعة الانفصالية فالشمال عندها كاع العناصر تنوض وان احزاب ضحكات على هاد المغاربة وفي مقدمها البام اللي كاع قيادتو من هاديك المنطقة واللي كان عندو دور فهاد التصريح سواء بسلبيته في ادارة الازمة حقاش متحكم فيها او عطاوها ليه او بمشاركة بعض قياداته كيف جات تصريحات البعض.
المهم ماشي هادا هو موضوعنا. الزفزافي قال باللي امني خشى صبعو فدبرو والثاني هددو بعصا وباغتصاب امو. هاد الشي شغل القضاء ماشي شي جهاز اخر حقاش الزفزافي كيقول باللي وقع ليه بعد اعتقاله اي بيد القضاء ماشي بيد شي حد اخر.
دابا ما شفتاش النيابة العامة كتجري وتفتح تحقيق بحال ما دارو مع شي وحدات فملف بوعشرين تراجعو على تصريحاتهم او نفاوها. هاديك الساعة النيابة العامة فالبلاصا ردات. وهاد الشي كيهم بلادنا كيهم خاص النيابة العامة تكلم وعلاش ساكتة علاش ما دراتش بعد 24 ساعة.
الزفزافي طلب بنتائج التحقيق فالفيديو الشهير ديالو. كيسول عليه. ما يمكنكش لشي عاقل فهاد لبلاد غادي يكول ماشي من حقو. الوكيل العام السابق حسان مطار كان فتح تحقيق وجا بيان وفين هاد النتائج.
صورة القضاء ومدى استقلاليتو غادية تبان فهاد المحاكمة فالرد على هاد التصريحات. دابا تقدر تكون بصاح تقدر تكون مزايدة تقدر تكون استراتيجية للدفاع ولكن خاص رد وعقلاني ويصدقوه كاع لمغاربة. كلشي متبع هاد القضية وقضية بوعشرين. هادي غادي تبين قضاءنا ولكن قبل انتهاء المحاكمة خاص رد على كل ما يتهم القضاء. رد سواء بالاقرار بالتقصير او الاعتراف بالخطأ او بالنفي او بمتابعة من يصدر هكذا تهم. السكوت كيضر لبلاد قبل القضاء اللي فيه شرفاء نزهاء كيتقاتلو على صورتو على ثقة المواطنين فيه