واش ولات بلادنا كتحتاضن المحتالين والنصابة. جوج لبنانيين داو اكثر من مليار وواحد فيهم ترشح فالانتخابات اللبنانية. قولبو شركات وباش يغطيو دارو كليب لمغنية مبتدئة ب50 مليون وعطى 10 الاف اورو لشي مشهورة ماشي فابور =صور ووثائق

بعد الجزائري اللي دا لملاير من المغرب وخرج على مستقبل اللاعب السابق ايت العريف حتى هرب لسنوات في الامارات عاد رجع وبعد شبكات اخرى بانت شبكة نصب لبنانية هاد المرة. هاد النصابة والمحتالين خاصة جوج منهم داو اكثر من مليار. هادي يومين التقوليبات اللي دارو خلاتهم يديرو اكثر من 900 مليون ودابا خرج ضحية اخر عندو 150 مليون.
كيفاش كانو كيديرو؟ اولا كيضربو على الشعا. ثانيا كيديرو شركات. ثالثا كيبينو للطماعة باللي اللعاقة موجودة. قصاير فمازاكان والفنادق لكبيرة فكازا. لدرجة انهم دارو كليب لشي مغنية مبتدئة ب50 مليون وكانو كيدورو مع شي وحدة مشهورة من هادك اللي كيديو شي لقب فالجمال والملوحة والغناء وعطاو لوحدة من هاد لكثارات 10 الاف دولار طبعا ماشي فابور.
هاد التقنية خلاتهم يتعرفو وتسهل عليهم كاع عمليات النصب. اللي طاح فالفخ هما شركات القروض. خداو من عندها بزافت الفلوس وشراو طونوبيلات ثم الشركات الاخرى وعطاو شيكات كثيرة وغبرو.
واحد منهم ترشح للانتخابات اللبنانية كاع باسم الشيعة. طلع شيعي ولكن باش تفرش وسمعو عليه جراو عليه وعوضوه. المهم فلوسهم اللي اختالسوها من المغرب ونصبو على شركات مغربية خدامة فلبنان فالانتخابات.
دابا علاش اجهزتنا ما ديرش خدمتها. بلا اجهزة خاص الضرائب دير خدمتها. ممكن يكونو طماعة وغاديين يبقاو حقاش شي مغاربة باغيين يوصلو بالزربة ولكن باش يكثر النصب راه كيمس الدولة.
دابا خاص كلشي يتفرش. تصدر مذكرة دولية او شكايات عند الوكيل العام ما كافياش. خاص التحقيق اولا مع السماسرية ديالهم مع اللي عرفهم على الناس ومع هادوك اللي تعرفو عليهم.
ولفلوس طبعا مشات طارت اكثر من مليار فظرف قياسي