كيفاش الياس وصحابو ركبو على الصحرا باش يبقاو متحكمين فالحزب وقولبو المنصوري. نساو تدبيرو للحزب واستقالتو لكذوب وها اش قررات لجنة المتابعة

فالسياسة خاصك توظف كلشي باش تقضي على الخصم ديالك ولكن ناس البام طلعو اساتذة فهاد الشي. فالحقيقة الياس العماري الامين العام للحزب اللي استاقل وقولب كلشي باش جا عندو فؤاد علي الهمة مستشار الملك وصاحبو فعرس ولدو وما بقاش مستاقل.
دابا البارح فكازا كان اجتماع اللجنة المكلفة بمتابعة مخرجات الدورة 22 للمجلس الوطني لحزب الأصالة والمعاصرة” فكازا.
اجتماع خرج خاوي كيفاش؟ صحاب الياس فهاد اللجنة اجلو الحديث عن اهم حاجة وعطاوها للانشاء٬ اذ جاء فالبيان انه “في إطار الانشغال الرسمي والشعبي بتطورات ملف الصحراء المغربية، جراء مجموعة من تحركات الخصوم الهادف إلى تغيير المعطيات على أرضالواقع” و”وبروح المسؤولية التي يفرضها الواجب الوطني في الدفاع عن الوحدة الوطنية ضمن ثوابت الأمة المغربية” و”واستشعارا بالمسؤولية السياسية في هذه الظرفية المفصلية، التي تقتضي وحدة الصف الوطني بالالتفاف حول المصلحة العليا للوطن” و”انخراطا في مسار تظافر الجهود واستثمار للعلاقات وتقوية الجبهة الداخلية وتشكيل جبهة سياسية ومدنية للدفاع عن الوحدة الترابية”
وووووو عقد اجتماع برئاسة رئيسة المجلس الوطني السيدة فاطمة الزهراء المنصوري وتقرر “بالإجماع تثمينها لعقد الدورة العادية 23 للمجلس الوطني،بنقطة فريدة متمحورة حول تقرير المكتب السياسي بخصوص القضية الوطنية، باعتبارها أولوية في المرحلة الراهنة، على أن تقدم عروض اللجان فيدورات لاحقة”.
يعني التنظيم والاستقالة والياس العماري ووو كلشي ما تهدروش عليه حقاش كاينة الصحراء. خطة كتبان بليدة بزاف ولكن شدات حقاش ما كاينش اللي غادي يعارض فهاد القضايا.
دابا هاد السياسيين وصحاب الياس وغيرو كيضحكو على ناسهم وكعتابرو لمغاربة اغبياء. راه هاديك الهدرة لكبيرة بتقوية الجبهة الداخلية ووو كتكون بالديموقراطية الداخلية ماشي بالتهييج. السيد استاقل ومشى فحالو ورجع وكتكدبو على كلشي بالصحرا. والصحرا ما محتاجاكومش وشوفو غير كيفاش كان لقاء امينكم العام فالعيون مع عمدة المدينة الاستقلالي حمدي ولد الرشيد. اي ان الامين العام ديالكم جزء من المشكلة ماشي جزء من الحل فهاد القضية اولا فقضية تدبير الحزب ثانيا. باراكا ما تفلاو على الناس