سكوب. الضرائب طاحت ب3 مليار درهم وهاد الشي كيهدد ميزانية الدولة وفرج غادي يمشي فيها وجاه تنبيه فوقي

مدير مديرية الضرائب عمر فرج عايش ايام صعيبة. فحسب مصدر “كود” فان الموارد الضريبية نقصات ف3 اشهر الاولى من هاد العام ب10 بالمائة. هاد الشي خلاه وفق مصدر من مديرية الضرائب “يجمع مؤخرا كاع المدراء الجهويين ومركزيين باش يحيح عليهم على هاد الانخفاض”.
وحسب مصدر “كود” فان غضبة جات لعمر فرج من فوق الحكومة على هاد التراجع الكبير اللي كيهدد ميزانية الدولة.
باش تكمل عليه٬ خرجات الخزينة العامة دورية كتؤكد فيها هاد الشي. المعطيات اللي طالعات عليها “كود” كتخلع. الضرائب على الشركات نقصات فهاد الاشهر الثلاث الاولى من هاد العام ب17 بالمائة والضريبة المهنية طاحت ب15 بالمائة ومجموع الضرائب طاحت٬ كيف اكد مصدر “كود”٬ ب10 بالمائة
وقدر مصدر “كود” هاد 10 بالمائة ب3 مليار درهم. حسب معارضي فرج فالمديرية فانه مسؤول على هاد الشي بسبب الجو الخاسر اللي دايرو وكيطالبوه يمشي فحالو حقاش وصل لسن التقاعد لكن فئة اخرى تؤكد ل”كود” ان فرج ضحية تصفية حسابات بين جهات فالمديرية. هي اللي دايرة هاد التخربيق. كما كشف ان لوبيات الفساد اللي كيخلوضو فكلشي خارج المديرية مقاتلة باش يمشي فحالها. دايرين ليه كيف دارت لوبيات مماثلة مع الوكيل العام فكازا حسان مطار. نهار مشى دارو حفلات فمطاعم كازا.