انقلب السحر على الساحر. شكون دفع مرا فتارميلات اللي فيها امبراطورية سيدي علي ديال بنصالح تغير اقوالها. وراكم شوهتو. السيدة كانت صادقة فربورطاج “اليوم 24” ومحفظينها فالتكذيب

فواحد الربورطاج دارتو “اليوم 24” بعنوان “في قلب قرية “تارميلات”..هكذا “يموت” الأهالي فقرا لتعيش “امبراطورية” مياه “سيدي علي” ودابا قرب ل200 الف مشاهدة٬ كانت شهادة مواطنة كتبيع الخبز وعايشة فبراكة قوية ومؤثرة. اييه انا ما مقاطعش “سيدي علي”. كنشربو وجاني الربورطاج فيه نقص لانو غيب مالين سيدي علي والجماعة اللي كتستافد سنويا من مدخول كبير اي الطرف الاخر٬ لكن كيبقى منساجم مع توجه الجريدة اللي ختارت تكون مع المقاطعة.
المشكلة ماشي هادي. الصحيفة دارت خدمتها. مشات لتارميلات. نزلات للتيران. جابت شهادات. انتقاد شديد لشركة “سيدي علي” ولكن فنفس الوقت قتلات هاديك الشائعة ديال راه ماشي ماء معدني. حنا كيهمنا شهادة لمرا مولات الخبز. حقاش البارح شي عبقري غبي جدا خرج ليها فيديو كتقول باللي داك الشي اللي قلتو فرضوه علي وحفظوه لي وباللي فيها السكر وما قارياش. ما غاديش ندخل فالتناقض ديال التصريح. حقاش هاد لمرا اكيد مسكينة هددوها. شي كيتكلم على انو اللي خدامين فالشركة دفعوهم يقاطعوها وما يبقاوش يشريو الخبز من عندها. المشكلة على شكون دفعها. خرجتها كتؤكد انها كانت صادقة بزاف بزاف فروبورطاج “اليوم 24” ومدفوعة ومحفظينها اش تقول فالتصريح الاخير.
اولا كتقول باللي حفظوها اش تقول. هاد شي كيكذبو تصريحها. كانت صادقة وهي تتكلم علي البؤس اللي كاين فتارميلات. كلامها بحالو بحال كلام جميع الشهادات. كلام عفوي خارج من قلبها. لبسها. طريقة حكيها. تعابير وجهها. تفاعلها وانفعالاتها كلها كتؤكد ان اللي قالتو فالربورطاج صادق. بلا زواق. زايدون الصحافية اللي دارت الربورطاج سارة الطالبي اش فيها مسكينة ما تفرض شي تصريح علي شي حد وعلاش اصلا غادية دير هاد الشي
فالفيديو اللي بغات تكذب فيه هاد الشي وتطلب السماحة من المخزن ومن الشركة ومن ومن بانت محفظة او مقهورة مسكينة. فبلاصة وحدة مصورة. لابسة لكحل. عايشة حداد. اللبسة فرشات مالين التكذيب. الكلمة شوهاتهم. علاش استغلو هاد المسكينة وضغطو عليها بعد ما قاطعو خبزها. حتى باب رزقها بغاو يسدوه. واش هادو بنادم.
هاد الشي اللي وقع كيضرب العمل الصحافي. ممكن تختالف مع زميل على المعالجة ولكن هاد الشي يبقى بين الصحافيين في اطارة مهني باحترام لاخلاقيات المهنة ماشي تحاول تضرب مصداقية جورنال دار خدمتو
ولكن ما يمكنش تنوض بامكانياتك
هادي ضربة للشركة كان عندها علاقة بهاد الشي او ما كان عندها علاقة. ضربة لصورتها اللي تكرفصات مع المقاطعة.