وا شوف الطنز كيف داير ! “الطاهر بنجلون” المغربي ! كايعطي الدروس فاحترام حقوق الانسان لماطيو سالفيني وزير الداخلية د الطاليان ! و الرجوع لله آ الطاهر راه كانساينوك دوي هنا ماشي لهيه

أنا شي مرات كانمرگ من مايسمى بال” نخبة المغربية” او ” الانتجانسيا” ! لي نورمالمو هي لي خاصها تساهم فتنوير الشعب ! و نشوفوها حاضرة فالبلاد و قريبة من قضايا البلاد و قلبها على البلاد.
المضحك المبكي هوا نشوف واحد فحال ” الطاهر بنجلون” لي واخا ديك الهالة الاعلامية الكبيرة لي كايديرو عليه المغاربة و كايتعناو بيه زعما ككاتب كبير! كاتب مؤخرا مقال عبارة عن رسالة موجهها لماطيو سالفيني وزير الداخلية ديال الطاليان كايقوليه فيها “الطاهر” بلي راه ماراضيش على الطريقة باش كاتعامل الطاليان المهاجرين ديالها ! و كايتشكى ” الطاهر” فالرسالة ديالو من العنصرية المقيتة و غياب حقوق الانسان في التعامل مع المهاجرين الغير الشرعيين فالطاليان ! و كايفكر ” الطاهر” الطاليان بلي تاهوما كانو شعب مهاجر و كانو كايمشيو لبلادات اخرى فحال فرانسا باش يخدمو فيها يامات كان عندهم الكساد و الجوع.
دابا السيد سميتو ” الطاهر” و كنيتو ” بنجلون” و محسوب او حاسبينو ” مغربي” بل و ماشي غير مغربي عادي و صافي السيد محسوب على ” النوووخباااا” المغربية ! كايوجه رسالة استنكار لوزير الداخلية ديال الطاليان بخصوص مشكل كايخص الطاليان ! وا شوف الجبهة كي دايرة !
كأنه سالاو القضايا من المغرب ! كأنه المغرب بيخير و على خير ماخاصو خير من ناحية حقوق الانسان و وضعية المهاجرين !
راه طبعا الطاهر حر يكتب شنو مابغا و يطرق للمواضيع لي بغا تاواحد ماضربو على يديه و قاليه كتب على المغرب ! و لكن من ” المروة” ! و شوية ديال ” المنطق” لاكان يكسابو ! تكون الاولوية للبلاد و لمشاكل البلاد.
راه ماجاتش آ الخويل تنوض تعطي الدروس للطاليان لي فايتانا بسنوات ضوئية فمجال حقوق الانسان !
راه فحال لاجات جمهورية البوروندي و قالت لفرانسيس ” ندعوكم لتنظيم انتخابات نزيهة و احترام حقوق الانسان”
وا حشومة آ صاحبي تال التعاويدة !
نتا كمغربي ! البلاد ديالك كاتاكل العصا فجونيف فاش كايتجبدو الضواسا د حقوق الانسان من طرف المنظمات الدولية و كايجبدو ليها القوانين القروسطية لي مازال كاتعمل بيهم فحال تجريم المثلية، و تجريم الافطار العلني فرمضان و وضعية المغاربة المسيحيين، و وضعية المرأة لي مازال كاتورث غير النص …. راه ماجاتش معاك تعطي الدروس لدولة فحال الطاليان فهادشي ديال حقوق الانسان، حدك تخبا و تمكش و ضرب الطم !
الطاليان راه كاتستقبل سنويا الآلاف ديال المهاجرين و هادشي منذ عشرات السنين و راه البحر الابيض المتوسط شاهد على وليدات المغرب لي حرگو فالباطيرات و منهم من وصل و منهم من قضي نحبه و كلاه الحوت.
قبل ماتعطي الدروس للطاليان و تسيفط رسالة لماطيو سالفيني ! آجي شوف هوك ! دور الطبسيل ديالك جيهت القمر الصناعي المغرب سات راه تاهوا كايستقبل المهاجرين و كايعيشو فيه وسط الغابات و فالجرادي بدون ادنى شروط العيش الكريم ! دور الطبسيل راه عاد هادي شي شهراين كانت نايضة سباط بين ولاد درب الكبير و المهاجرين لي كاينعسو
حدا المحطة ديال ولاد زيان وسط الگياطن و الوسخ !
واا الخويل ! وا الطاهر ! نتا ” المغربي ” لي باغي تعطي الدروس المسؤول ” طالياني” فوقاش غانشوفوك كاتعطي الدروس لمسؤول مغربي ؟ فوقاش غاتشوفوك كاتشكى من وضعية حقوق الانسان فبلاد نتا زعمة محسوب من النخبة ديالها لي غاتزيد القدام ؟
راه ماكاينش لي غايخرج على هاد البلاد قد هاد الفراغ لي ماقاداش تعمرو النخبة د المرقة و العام زين ! هضرو شوية ! ! شاركونا فكاركم و آراءكم! و ديرو يديكم فعصيدة التغيير.
هادي هي ديال حزموني و رزموني و ماتعولوش عليا !