احتفالات راس العام ف الرباط.. كاين لي ناشط ولي محتج حدا البرلمان وموسيقى الشارع منشطة القضية و إقبال كبير على البيسريات

اختلفت الأجواء ديال الاحتفالات ف العاصمة الإدارية الرباط على باقي المدن المغربية لي فيها الاحتفالات بحال كازا ومراكش طنجة وفاس وغيرها من المدن لكبيرة. وكما عاينت “كود” خلال الجولة اللي دارتها ف شارع محمد الخامس وسط الرباط، فإنه كاين لي محتلف وكاين لي كيحتج.
واستغلت ساكنة دوار الكرعة هاد الليلة لللاحتجاج على تنقيلهم من براريكهم وخا الدولة عوضاتهوم حيث قدمت لهم براطم مقابل مائة ألف درهم. المحتجون كيقول معندهومش هاد المبلغ مقابل الشقق وحتى لفلوس باش غادي يبنيو.
الاحتفالات ديال راس العام خلات المصالح ديال ولاية أمن الرباط تدخل فسلسة من الإجراءات الاحترازية. هاد الإجراءات بدات فيها هادي أيام بطبيعة الحال، على غرار باقي ولايات الأمن، الموزعة على المتسوى الوطني، ويصل عددها 13 ولاية.
شارع محمد الخامس ف وسط العاصمة الإدارية كانت فيه حركة دؤوبة بزايد. المداخيل ديال البرلمان كانت كولها مطوقة بوليس وحتى المقر ديال المديرية العامة للأمن الوطني كانت فيه حراسة أمنية جد مشددة العيون ديال رجال الحموشي حاضية كولشي.
وككل سنة. خرجو الرباطيين من المنازل يشريو الحلوة ديال راس العام لكن مكانش الإقبال على الحلوة بداك الشكل ديال شحال هادي. ولي عزيز عليه الشراب خرج بزايد يقصر. وحتى البيسريات ديال شراب خدامين بزايد كيف شافت “كود”.