بالفيديو. واش المغرب كيبني سياج لحماية سبتة ويعترف ضمنيا بإسبانيتها؟ السلطات كتنفي والاسبان كيأكدو

نشرت صحيفة “ال فارو دي سيوتا”، الصادرة من سبتة المحتلة، مقطع فيديو كيبين أشغال بناء سياج شائك على بعد أمتار من السياج ديال الصبليون، وقالت أن المغرب كيبني سياج جديد لحماية المدينة من هجومات المهاجرين الافارقة.
صحيفة “ال موندو”، مشات أبعد من ذلك وقالت أن المغرب واخا قال قبل ثلاثة أشهر أنه كيدير سياج لحماية مراكز المراقبة الحدودية، لكنه دابا فات هاد المراكز وبدا كيدير السياج على طول الحدود.
وقالت الصحيفة أن المغرب تسلم الدفعة الاولى من الفلوس من الاتحاد الاوروبي ودابا كيدير بيها السياج الحدودي.
“كود”، اتصلت بمصدر في معبر طاراخال لسؤاله عن هاد السياج اللي كيتبنى، وأكد أن تاواحد ماعندو علم بهاد السياج، ولكن كاينة هضرة كتدور عليه بأنهم غايصايبوه غير فوقاش ماعرفناش.
دابا الدولة يلا دارت هاد السياج راه بغض النظر عن حماية سبتة، راه كتعطي الشرعية لإسبانيا لي كتعتابر أن سبتة ومليلية مدينتين اسبانيتين، وشي نهار يلا فكر المغرب يحط ملف انهاء الاحتلال غايكون مرقف أكثر من ضعيف.