دكتور “القرويات”

شحال كايكون غالط بنادم، بالأخص إيلا ما كانش مطالع على فنون، جمالية أو قوة اللغة اللي يمكن ليه يستعملها حسب الظروف أو المناسبات، يمكن لينا نعتابروها من أهم الأدوات الكونية، بيها كايمهّدوا الشعوب للخصومة، أو بيها كايهييّجوا الشعب، كايهزّوا السلاح، بلا لغة، الكلمات ولا أمر واحد غادي يتنفذ، ولا دولة وحدة يمكن ليهاتكون قائمة الذات، كل حاجة تفوّهنا بيها إلا ّ أوعندها تأثير على لاخور ولا ّ لوخرين، من المستحيل ما أتجاوبش مع الكلام، غير إمّا بالسلب، الإيجاب ولا ّ بالصمت اللي فى الأصل حتى هو كايعبّر على موقف: ما معاك، ما ضدك، أو داك الشي بيناتكم، أنا غير معني، أو جميع البلاغات، الرسميات، الأخبار، الخطب، كانت دينية ولا ّ سياسية، الإشهارات إلخ كلها كاتصب ّ في نتيجة وحدة: باغيين مّالينها يعطيوْا لهضرتهم وجهة معينة مفادها التأثير أو التوجيه.
اللغة قوة، اللي ما عرفش يتعامل معاها كاتخروج عليه، اللغة ماشي غير كاتحمل ليك ميساج من عند هادا لَعند لاخور، لا! بالعكس كاتحيلك على آمال، طموحات، ترقب أو كاتشعل فيك عافية المنسي، المكبوت ولا ّ حب الإستطلاع، باللغة كاتحكم على هادا أو لوخرة أو كاتتخذ القرار الازم، غير بالكلام يمكن لينا نبنيوْا قصورى، عالم، كوكب ما عمّرو خرج من الموخّ، غير إيلا نطقنا ببعض الكلمات غادي يمكن لينا نكتاشفوا، نتصوّروا مولاها، إيلا قولنا فى المثل: “مرمضن”، يعني مغوبش، كئيب، دغياكاتّشعل فيه العافية، “قابل للتفجير”، ولا ّ “كسيدة”، دغيا كانخمّموا فى الدم أو الجرح، على داك الشي كانقولوا “اللهما فى الحديد ولا فى بنادم”، كل كلمة تفوّهنا بيها إيلا ّ أو كان مرادفها صورة، ماعدا فى بعض العلوم اللي كثير من الكلمات تجريدية ما غاديش يمكن ليك تربطها بشي تصويرة.
لحد الآن ما كاينش اللي عرف ياكولنا من الكتف بحال الإشهار، فاين أمّا مشيتي غادي تعثر فيه أو عليه، فى السوبير مارشي، فى الزناقي، الشوارع الكبيرة، التلفزة، الراديو، الأنتيرنيت، على التراموي، على حيوطى العمارات إلخ، بحال كوكاكولا،”كوكاغولة”، فى القرية المتلوفة ما تمشي حتى تَكول ليك العين، ولوْ هاد المشروب الإسطناعي، يعني مصنوع، غير صحي، الماء العادي حسن منّو بكثير.
اليوما كاين ختصاص فى ميدان الماكرتينڭ اللي كايسمّيوه “علم النفس الإستهلاكي”، أو صحاب هاد التخصص كايقولوا حسب التجارب اللي قاموا بيها أن بعض الكلمات يمكن ليك تربطها بذوق رفيع، بلا ما تعرف المكونات ديالها، تبثوا فى إطار التجارب المختبرية أن بعض الفونيمات، يعني وحدات الحركات الصوتية، يمكن ليها تدلّك على شي حاجة قاصحة، رطبة ولا ّ كاتمييز بريحة طييبة، ضروري تشريها، كاينين إعلانات ناجحة، خرين ما فيهم ما يتهزّ، بحال ديال “أورونج”: “من المهم ديما قريب”، شنو هاد الهضرة الخاوية، هاد التفاهة؟ لا ستعارة، لا اللعب باللغة بطريقة جميلة، خلاقة، بحال إيلا ما كانعرفوش نقراوْا، يمكن شي مفرنس ترجمها من لغة أمّو الجديدة أو بغى، يضحك، يتفلا ّ على اللغة المغربية، اللي كايسمّيوْها جميع المفرنسين “لو دياليكت آراب”، ولو اللهجة مرتابطة ديما غير بجهة من جهات المملكة أو ماشي مدّاولة فى البلاد كولها، المتعصبين منهم كايكرهوا لا المغربية لا العربية أو ما كرهوش إكونوا طرف من فرانسا.
إيلا بغيتي تعرف كيفاش تكون محبوب، إكون منتوجك ناجح خصّك أتواضع، خصك تكسب قلب أو عقل الناس، ماشي تطلع للصمعة، للسما، هاز راسك، حاشي منخركفى السما، كاتحرث بيه السحاب، يمكن إجاملوهك الناس، ولاكن غير تعتّب على باب الدار من جديد، ما كاين غير “السّكود”، بلا حدود، حتى هربات الحشمة من الخدود، لغة الإعلانات خصّها مّاليها: الكتاب، الشعراء، الملحنين، الصحفيين المبدعين منهم إلخ، ماشي الدبّازة.
حتى فى السياسة ضروري يعتامدوا المسؤولين دياولنا على اللي إكتبوا ليهم خطاباتهم السياسية بحال اللي جاري بيه العمل فى الدول المتقدمة، أمّا عندنا حتى هاداك اللي مسمّيينو الناطق الرسمي باسم الحكومة خصّو اللي يكتب ليه خطبكاتشرّف، خالية من الثرثة، الحشو أو الكلام الفارغ، أمّا إيلا تسلّطوا شي وحدين من دوك الكبار دياولهم على الميكروفون، غير صبر معاهم، ربّي عوين، ما كاين غير نصب اللي ما كايتنصبش أو رفع اللي ما عمّرو أتّرفع، تلعثم، شهق، حتى البكى وارد، أو إيلا هربات ليك الهضرة، حصلتي، قلبتي شقلبتي المعنى، ما عليهش، “إن الجمهور غفور رحيم”، علاقتنا الحميمية مع اللي حاكمينا كاتكون من موخ ألْموخ، يمكن ليهم إدوخلوا ليه من الباب الواسعة إيلا عرفوا إخاطبونا، ماشي يتعاملوا معانا بحال إيلا باقيين كانرضعوا صباعنا، لحد الآن الكذوب، التهرتيف أو نسج العنتريات، الخرافات هو صاحب الريّ.
كاين حتى اللي فقد صوابو، بدا غير كايطلق بلا ما إدّيها فى شنو كايقول، أو كاينين بعض الزلات اللسان اللي كانطلقوا عليهم المصطلح العلمي: “زلة لسان فرويْدية”، المنسوبة لْزيڭمونت فرويد، الباحث أو الأب الروحي ديال الطب النفسي الحديث، زلة لسان كاتفضح ديما مولاها، لأنها ما كاتخروجش من فراغ، مرتابطة ديما بصاحبها بوحدو على وجه الأرض، أو ديما كاتشير للنزوات، تطلعات، للرغبات المكبوتة، المردومة فى الاّوعي ديال هاد الشخص أوْ لاخور.
الاوعي كايقوم بإنجاز خلا ّق، بطريقة مبدعة، بلا ما يفطن بيه مولاه، حتى كايبداوْا الناس كايضحكوا، غير إمّا بطريقة محتشمة، ولا ّ ما كاين غير كسيري، من قبيل: “الشمس كاطّيح اليوما”، فى عوط الشتى، “عضّيت فمي”، فو عوط: عضيبلساني، “ناري آ ختي: عينييا بداوْا كاطيحوا فى شعري، خصّني نقطع الشعر”، الشعر بدا كايطيح فى عينييا، أو كاينين بعض زلات اللسان اللي يمكن لينا نعتابروهم زلات القرن، بالأخص إيلا كانوا مرقّدين، مشرملين مزيان بالجنس، لأن الجنس فى مجتمع محافظ كايتعتابر من الطابوهات الكبار، عاد تخرج من فم واحد كاينتامي للمعسكر الإسلام السياسي فى رمضان، “واحسرتاه”، هادي ما عمّرها أتنسى، الطبيعة فحّمات التطبّع.
فى هاد الحالة عْيى مول زلة اللسان يتصنّع، يحتال على راسو، إنافق نفسو، صرعو الاوعي أو رمى اللي فى جوفو، فى دواخلو للوجود، سلّط عليه الضو بالزّز عليه، بحال البحر إلا صرط شي حدّ، ما كايمشي حتى كايتڭرّعو، أو اللي ساكنو شي كبت، مرض من الأمراض المزمنة ما تمشي حتى تفضح مولاها، هاد الشي ما عندو حتى شي علاقة ب “كودْ سيرْكْوي” فى الموخ، صدفة ولا ّ تهرتيف أوْ مرض الألدزايمر، لا! ولاكن باللي شاغل الداخلاني ديال هاد الشخص، هادوا رغبات ملموسة اللي كايشقوا طريقهم من أوسط الشخص باش إرجعوا حقيقة، لأن الفوم كايقول شي حوايج اللي كايفكر فيهم الموخ ولاكن ما مسموحش ليه إفكر فيهم ولا ّحتى إحاول إفكر فهيم، الفرق بين علماء النفس أو علماء اللغة هو أن علماء اللغة يمكن ليهم إقولوا ليك “شنو” اللي طرى، أو علماء النفس غادي يشرحوا ليك “علاش” طرى هاد الشي.