اللي كايتبع الشأن الثقافي المغربي كايعرف مزيان المعاناة ديال الكتاب اللي ماعندوهمش خالتهم في العرس مع النشر ولا حتى الحضور في الملتقايات ولا الأنشطة ديال الوزارة بحال المعرض الدولي ديال الكتاب بالدار البيضاء وما شابهه. وكايعرف أن دور النشر أغلبها بحال كثير من الجمعيات المدنية والثقافية اللي تدارت غير وسيلة للحصول على طرف من الكعكة اللي كتوزع في جميع القطاعات بطريقة ولا بأخرى … المهم دير جمعية ولا دار نشر ولا فرقة مسرحية ولا جريدة ولا موقع الكتروني وأجي خوذ حقك ديال الحلوى. وبما أن القطاع الثقافي كيبقى حتى هو خاضع لهاذ المبدأ، لجأ عدد من الكتاب الشباب الي معندهومش مظلة لداك اللعيبة ديال الكاتب الناشر، زعما تطبع الكتاب على حسابك في المطبعة وتجمع كراطنك وتوزعها بيدك على القراء ديالك. عبد العزيز العبدي الناشط الفيسبوكي المعروف والكاتب الروائي وخا هو كايقول غير كايخربش واحد من الناس اللي التجأو لهذ الحل ديال الكاتب الناشر أو النشر الذاتي وحقق نجاحا كبيرا في نظري. كيف الكتاب الأول كيف الكتاب الثاني، لجأ العبدي لتوزيعو عن طريق تلقي الطلبات بواسطة صفحة في الفيسبوك ومن بعد إرسال الكتاب سواء دفعتي الفلوس ولا حتى من بعد وهذا اللعيبة مبنية على الثقة المتبادلة وبالتالي كثير من الناس توصلوا بالرواية قبل ما يخلصوها. الأهم في هذا الأمر هو أن هذه الطريقة بغض النظر عن قيمة الكاتب وكتابه شكلت حل للمشكل ديال التوزيع ولْغَاتْ الدور ديال الناشر والموزع وبالتالي القراء كايتواصلو بشكل مباشر مع الكاتب في مختلف مراحل إنجاز الكتاب، حتى من الغلاف طرح الموضوع على الفيسبوك وتلقى عدد من الاقتراحات خذا منهم واحد. عبد العزيز تميز ماشي غير في طريقة التوزيع ولكن حتى في نوع المواضيع اللي كايتناولها وكيفاش كيعالجها، مثلا الرواية الآخيرة ديالو اللي سماها “طرسانة” (وحتى إذا فتشتو عليها في المعجم ماكيناش حيث كاينة غير فالراس ديال العبدي) بناها على قصة واقعية ديال واحد السيدة كانت كاتبغي واحد العسكري وماكتابش تكمل قصة الحب ديالهم لأنه تشد عند البوليزاريو في حرب الصحراء، وبقات كاتساينو ومقطعاتش الياس حتى تطلق سراحو وتزوجو. الكاتب خذا القصة ونفخ فيها شوية المجاز ودعمها بأسلوب روائي سلس وجميل ومنساب إلى درجة ما كتحسش بداك العثرات والتوقفات وانت كتقرا الرواية. وهكذا استطاع العبدي أنه يكتب واحد ملحمة حب جبلية من الطراز الرفيع بلا مايدوز على لغة الخشب واستعراض ديال المعارف والتكوين الأكاديمي اللي كيلجأو لو أساتذتنا الكرام الله يسمح ليهم من القراء ديالهم ومن غابات الأمازون اللي شحال من شجرة مشا وراقها هباء منثور من بعد ماتطبع عليها شي نص ركيك عامر مفاهيم حجرية ومصطلحات خشبية لا حياة فيها. والعبدي واحد من الجيل ديال الكتاب اللي ظهر مؤخرا واللي حاول يقطع مع ذاك التكتلات هذا ديالنا وهذا لا، هذا ماش ي من الحزب وماعندهومش خالتهم في اتحاد كتاب المغرب وبيت الشعر وزارة الثقافة وزيد وزيد من المؤسسات الرسمية وشبه الرسمية والمؤسسات اللي كترضع الدعم من المحيط إلى الخليج بمجلاته وسفرياته الفاخرة في دبي والدوحة وباقي عواصم النفط ومشتقاته… هذا الجيل استطاع يخرج أعمال اعتمادا على الديموقراطية اللي جابتها وسائط الأعمال الاجتماعية اللي سحبات البساط من تحت أقدام بزاف ديال الديناصورات في الميدان الثقافي وخلات المبدعين وجها لوجه مع القراء واللي ماعندو مايقول يرجع اللور … وفي نفس الوقت جابت معاها وحد الموجة ديال التفاهة والتسطيح اللي ماكتعطلش، دغيا كاتذوب. ماشي غير العبدي مول طرسانة الي اظطر لحل الكاتب الناشر بل كاين عدد من الكتاب من بينهم أحمد الكبير اللي طبع أربعة ديال الروايات وآخرها كلاي اللي أيضا يقوم بتوزيعها عبر البريد، والشاعر الشاوني عبد الجواد الخنيفي اللي هو الآخر طبع ديوان ووزعو بلا ما يعتمد على دار النشر ولا موزع بحيث استطاع بهذه الطريقة يوصل العمل ديالو لأماكن بعيدة في المغرب وخارجه، وهو بالمناسبة ديوان جميل وشفيف يفيض بروح صاحبه الرقيقة اللي شربانة من رأس الما الروح ديال الشاون وما أدراك ما الشاون. المثال الآخر واللي كايختلف شوية على هذه التجارب، بحيث كايشرك القراء ديالوا في دينمامية الرواية عبر نشر فصولها على صفحة بالفيسبوك، هو الكاتب الروائي الطنجاوي عبد الواحد الستيتو اللي آخر عمل ديالو لاحو للقراء عن طريق تطبيق في متاجر التطبيقات الالكترونية اللي يمكن بسهولة تحميلها من بلاي ستور ولا آبستور، وبهذا الطريق استطاع يجمع عدد من القراء الافتراضيين الأوفياء واللي من بعد كايتحولو إلى قراء حقيقيين كايشريو الرواية منين يطبعها.
