كيفاش “الربيع الجزائري” ومسيرات الشعب للمطالبة بنظام جديد عطى منتخب زاهي مختالف كيتقاتل وكيفاش ديكتاتورية السيسي عطات منتخب خايف مرعوب خرج بكري

الجارة الشرقية الجزائر عايشة ربيعها اللي جا متأخر مقارنة بدول اخرى عاشت هاد الربيع. الربيع الجزائري وصل دابا ل21 جمعة كيخرجو فيها سكان هاد الدولة باش يطالبو اصلاحات لنظامهم السياسي. كيطالبو ب”الدولة المدنية” ماشي الدولة العسكرية اللي متحكمة فمفاصل النظام من سنوات.
هاد الحراك او هاد الربيع اللي مختالف عن “الربيع” العربي لاخر اللي عرفاتو دول بحال مصر او تونس ومختالف حتى على اللي كتعيشو دابا السودان. الجزائريون فمسيراتهم واحتجاجاتهم كل جمعة حركو اشياء فالسياسة الجزائرية اللي تخيخات من عدم الحركة ومازالت اشياء اخرى. وقعو محاكمات.
فهاد الجو جا تألق المنتخب الجزائري لكرة القدم فكأس افريقيا للامم اللي كاينة فمصر. من الماتش اللول لهاد المنتخب اللي كيدربو جمال بلماضي. جزائري تزاد وتكون ففرانسا. كانت انتصارات المنتخب الجزائري كتعكس الحركية اللي عرفها هاد الشعب اللي عاش حرب دامية فالتسعيناتين العسكر والمتطرفين الاسلاميين الارهابيين واللي قتلات اكثر من 200 الف شخص.
الجزائر عايشة ربيع زاهي دابا. عايشة حركية سياسية. هاد الحركية كتفسر تعاطف الجمهور المغربي غير المسبوق مع منتخب الخضر. فالاحتجاجات كانت دعوات للتقارب مع المغرب. دعوات لفتح الحدود. رد لمغاربة بعد خروج الاسود من ثمن النهاية فهاد الكاس الافريقية٬ كان تشجيع هاد المنتخب. شفنا اش كيفاش كان الاحتفال بانتصارات الجزائريين فالحدود المسدودة المغربية الجزائرية شفنا لقهاوي فمدن مغربية تحولات كلها خضرا. شفنا مول قهوة ففاس وشعار “اذا مغربي اذن انا جزائري”.
الوضع السياسي والبحث عن غد افضل باصلاحات سياسية كبيرة اثرات علي نفسية اللعابة وكان ليها دور فهاد الشي اللي كيقدمو المنتخب الجزائري. هاد الدينامية كتفسر جزء من هاد النجاح. حقاش الكورة خاصها فرقة مقادة صحيحة ولكن احيانا محفزات خارجية بحال الحراك اللي فالشارع الجزائري عندو محرك كبير لهاديك القتالية اللي كيبلعبو بيها اليوم الدزايريين. كتحس بيهم لاعبين ماتش حياة او موت. لاعبين نفس اللعب اللي لاعبينو الجزائريين فالشارع كل جمعة.
شوفو مثلا المنتخب المصري. عندو نجوم وفمقدمتهم محمد صلاح. عندهم الجمهور. خرجو فالثمن. الوضع السياسي كحل. السيسي حابس عليهم النفس. بغى يستغل هاد الكاس باش ينسي المصريين المشاكل الاقتصادية اللي غادية وتكثار وينسيهم القمع اللي غادي ويتاسع والاعتقالات اللي غادية وتتوسع. فشل فهاد الشي. الجو العام فمصر فيه الخوف. هاد الخوف بان على اللعابة فالماتشات وتقصات الدولة اللي عندها روكور فعدد الكؤوس الافريقية.
هاد الحراك فالجزائر عطى فرقة محركة زاهية فربيعها والقمع فمصر عطى منتخب خايف بحال شعب ارض الكنانة. هاد التماهي بين الوضع الداخلي والكورة وقعات فعدد من المناسبات. المثال الواضح المانيا بعد انهيار جدار برلين ولات المانيا اخرى. ربحات كؤوس العالم وحيحات.