شوفو هاد لجواهري ما عندوش علاش كيحشم. مستشارا الملك كيهدرو على احزاب سياسية مازال ما خدماتش مزيان بالدستور وهو: منظومة التربية والتعليم تأثرات بالحسابات السياسية. يا السي الفاهم ايلى السياسي ما هدرش فالتعليم فاش غادي يهدر

فحوار مستشارا الملك مع وكالة الانباء الفرنسية قال محمد المنوني =واحد من هاد المستشارين= باللي الدستور الجديد للأحزاب السياسية إمكانيات أكبر لتفرض نفسها مقارنة مع الماضي، لكن التطور المنتظر على هذا الصعيد لم يتحقق بعد في الواقع. ربما يلزمه وقت”
وذهب الى اننا “على طريق ملكية برلمانية (…) لكن بطبيعة الحال ما تزال ثمة ربما بعض المقتضيات التي يلزم تجويدها”. هذا خطاب مستشار للملك خرج باذن الملك وقال اللي باغي الملك يقولو.
اليوم خرج عبد اللطيف لجواهري والي بنك المغرب باش يهدر على السياسة بطريقة غريية. قال خلال تقديمو لتقرير هاد البنك السنوي حول الوضعية الاقتصادية والنقدية والمالية ل2018 للملك محمد السادس بتطوان ان “وبالنظر إلى التحديات التي يواجهها النسيج الإنتاجي، الذي يعاني من هشاشة بنيوية ويشكو على الخصوص من منافسة القطاع غير المهيكل، شدد والي بنك المغرب على أنه يتحتم على السياسة العمومية أن تضع ضمن أولوياتها توفير المناخ الملائم لتطور المقاولة المغربية وتعزيز قدرتها على مواجهة المنافسة الدولية. وأضاف الجواهري أن تحقيق هذا الهدف يتوقف بالدرجة الأولى على إصلاح منظومة التربية والتكوين الذي تأثر تفعيله بالحسابات السياسية، في وقت باتت فيه متطلبات سوق الشغل في تصاعد كبير، خاصة بفعل تداعيات الثورة الرقمية”.
دابا اش كيقول هادا كيفاش اصلاح منظومة التربية والتكوين تأثر تفعيلو بالحسابات السياسية. اش دور الاحزاب السياسية ايلى عبراتش على المجتمع. على الحساسيات اللي فيه. واش المدرسة كيف كيتصورها حزب محافظ غادية تشبه للمدرسة اللي غادي يتصورها حزب اشتراكي مثلا او حزب ليبرالي.
بنكيران باش ريب الحفلة بهادوك اللايفات ديالو من دارو كان كيدير السياسة. كان كيوجه خطابو لناسو. لوحدين بحالو. حزبو باش صوت كان كيدير حتي هو السياسة. كيدير التوافق باش ما يفركش الاغلبية ديالو.
انت يا لجواهري ديها فتقريرك وخلي عليك الدروس. السياسة خاصها تكون. راها ناقصة بزاف. بالعكس غيابها تهديد كبير للبلاد. التقنوقراطي بحالك عطاهم الله ولكن ايلى تحرك الشارع غادي تجمع حوايجك وتغبر ما تقدرش تواجهو حقاش ماشي مهمتك، هادي مهمة السياسي الى خلاوه يهدر فامور بحال المدرسة.