قادة وشبيبة الاحرار لاخنوش: معاك حتى الموت ورئيس الاحرار: بحالكم كيخليوني ما نطيحش واخا يبقاو يضربو

عبر قادة وشبيبة التجمع الوطني للاحرار مساء اليوم فافتتاح الجامعة الصيفية للحزب بمسرح الهواء الطلق باكادير عن دعمهم ومساندتهم لرئيسهم عزيز اخنوش. ادانوا ما يتعرض له. مولاي حفيظ العلمي ورشيد الطالبي العلمي ولمياء بوطالب ومحمد اوجار اللي تعاقبو على الكلمة بالاضافة الى اعضاء شبيبة الحزب وقرابة 5 الاف شخص حضر للافتتاح كلهم عبرو على هاد التضامن. شي بالشعارات. شي باللافتات. شي بالكلمات.
محمد اوجار قال فكلمتو ان الرئيس والحزب كيتلقاو الضربات فكل مناسبة كيبانو فيها اقوياء واضاف “رسالة لمن يغضبهم حزب قوي موحد” ان “الاحرار ” معتز برئيسه اخنوش وملتف حوله” واكد ان هاد الحزب لن يتخلى عن هذا البناء اللي بدا.
رشيد الطالبي العلمي شدد على تموذج الرئيس اخنوش. اكد ان المقاطعة ما غادياش تخلعهم. وباللي ما مسوقين لوالو من هاد الهجومات.
المقاطعة ثم تقرير المجلس الاعلى للحسابات والحملات الاخرى كانت مهيمنة على هاد الافتتاح.
عزيز اخنوش رئيس الاحرار بدا متاثر بزاف بالاستقبال اللي داروه ليه باش خدا الكلمة فاخر هاد الافتتاح اللي كان طويل. قال باللي هادوك اللي كيهاجموه “خاصهم يخرجو البازوكا باش يضربو” باش يشوفو هاد الاستقبال.
واضاف موجها كلامه لشبيبته “هادا اسبوع وهما كيضربو” ودعا الشباب الحاضر فالافتتاح باش يقصرو على هاد الناس.
اخنوش كانت رسالتو واضحة للشباب. مستقبلكم بين يديكم. ديرو السياسة. انخرطو فيها.
من اللقطات المثيرة فهاد الافتتاح هو شاب تبادل الكلام مع اخنوش. قال ليه الشاب باللي كيدعمو. كيثيق فيه وباللي مع اخنوش حتى الموت. رد عليه اخنوش: بحالك هما اللي كيخليوني واخا ناكل لعصا كل مرة ما عمرني نطيح.
اليوم لقى اخنوش الدعم فحزبو.