تهاني مدير الاتصال قولب عبيابة وبغى يبقى واخا تقاعدو قريب. كيفاش هاد المتخصص فالضحك على لوزارا مفتاخر بعلاقتو بالناطق الرسمي باسم القصر الملكي

علمت “كود” ان عبد الإله تهاني مدير مديرية الاتصال بقطاع الاتصال اللي كان خاصو يمشي تقاعد فاخر العام٬ قد تقدم بطلب لرئيس الحكومة باش يدبر ليه تمديد.
تهاني قولب هاداك الوزير العيان اللي ولى مكلف بقطاع الاتصال لحسن عبيابة ودوخو كيف حاول يدير مع اللي سبقوه٬ وقبل ليه هاد الطلب واخا ماشي قانوني.
علاش طلب هاد التهاني اللي كيقول باللي لمريني الناطق باسم القصر الملكي صاحبو ومظلة ليه٬ حقاش ايلى بغى يقدم طلبو كيف كيقول القانون خاصو يحطو عام قبل ما يوصل للتقاعد. هاد الشي ما داروش.
واش رئيس الحكومة غادي يوافق ليه كيف وافق ليه عبيابة٬ واخا هاد الشي ماشي قانوني؟ كلشي محتمل مع هاد بنعرفة.
هاد التهاني معروف برغبتو الدائمة فخوض حروب. دارها مع الخلفي وقولبو وعاودها مع لعرج وتاق فيه فاللول وحفر ليه بزاف وقاد حروب ضدو. اليوم لقى هاد عبيابة داير فيه ما بغى.