عموتة عيط ل 5 لعابة فيهم 3 من تطوان ورجع قرناص

الحسين عموتة، مدرب المنتخب المحلي، عيط ل5 ديال لعابة أخرين باش يلتحقوا بالتجمع التدىيبي، الذي يخوضه المنتخب الوطني استعدادا الماتش ديال غينيا نهار الأربعاء جاي بملعب المجمع الرياضي الأمير مولاي عبد الله في الرباط.
عموتة عيط ل3 ديال اللعابة من تطوان باش يلتحقوا بالكونصوتراسيون، ويتعلق الأمر بكل من محمد مكعزي وحمزة المساوي ورضا بوناكة، وسعد أيت الخرصة من الفتح الرباطي والمهدي قرناص من الدفاع الحسني الجديدي، اللي رجعو مدرب المنتخب المحلي، بعدما تقصات فرقتو من دومي فينال ديال كأس العرش.
عموتة زاد 5 ديال اللعابة باش يشوف اكبر عدد من اللاعبين، وغادي تكون عندو الفرصة باش يختبر إمكانيات الحارس بوناكة، خصوصا بعد التحاق الحارس هشام المجهد بالمنتخب الأول، بعد إصابة الحارس أنس الزنيتي.
عموتة ما عيطش للعابة ديال حسنية أكادير لحقاش غادي يلعبوا الفينال ديال كأس العرش كونتر الاتحاد البيضاوي نهار الاثنين جاي بملعب الشرفي بوجدة.