الانفصال وجرائم تعذيب قادة البوليساريو لصحراويين غطات على انشطتها فذكرى تأسيسها فاسبانيا وجبهة معارضة زعماء الجبهة غادية وتتقوى

ربما هادي اول مرة فتاريخ مؤتمرات الجبهة كتعرف غياب االلقاءات القبيلة لقادة البوليسايو فوسائل الاعلام الاسبانية. زعماء الجبهة منهم الجلادون البشير مصطفى السيد والطالب عمر دارو انشطة تحضيرا للمؤتمر 15 الشهر المقبل وما تسوق ليهم حد. دارو انشطة بالتزامن مع عيد الاستقلال للمغرب وما داوهاش فيهم وسائل الاعلام الاسبانية.
هاد العزوف كاين حتى فالتحضير لهاد المؤتمر داخل تندوف. جريدتهم “المستقبل الصحراوي” نقلت ان “أغلب مكاتب تصويت فروع قطاعات الشهيد الحافظ، شهدت عزوفا كبيرا في الحضور وحتى الترشح للمشاركة في أشغال المؤتمر الشعبي العام الخامس عشر، وكانت الندوات الأساسية للمؤتمر الشعبي العام الخامس عشر قد بدأت يوم أمس بالشهيد الحافظ بعد ان انتهت في قطاع الخلف العسكري”.
هاد العزوف برراتو ب”يأس المواطنين من أي تغيير مرجوا من المؤتمر ويمثل رسالة شعبية للقيادة الصحراوية ان الشعب لم يعد تعنيه مسرحيات القيادة التي تسمى مؤتمرات شعبية، التي لاتعدو ان تكون مجرد مسرحية لتجديد نفس الوجوه التي هيمنت على المشهد السياسي لأكثر من اربعة عقود و اوصلت القضية إلى وضعية الجمود التي تمر بها منذ عام 1991″.
هاد الضربات اللي كتاكلها الجبهة جات بعد ما نشرته قناة “الغربية” من شهادات قاصحة بزاف على طرق التعذيب اللي دارها جلادو الجبهة واللي كلهم قادة فهاد التنظيم٬ لمعارضين صحراويين. القتل. الاغتصاب. التعذيب اليومي. كلشي داروه.
من الضربات اللي خداوها فاسبانيا هو دعم بعض قادة البوليساريو والمنتسبين ليها للانفصال في كاطالونيا. تهزات الراية ديال الجبهة مع راية الكاطالانيين. هاد الشي اكيد صدم مدريد. بلا ما ننساو الاحتجاجات اللي بدات هادي شهورا فالرابوني
فاسبانيا بدات حركة التغير كتبان. بالموازاة مع التحضير للمؤتمر بدات تنسيقها مع صحراويين. هاد الحركة اللي فيها كل من احمد الحاج ولد بريكة الله وللي كان ممثل الجبهة فمدريد وفالمكسيك واللي خو البخاري ممثل الجبهة فنيويورك٬ ومعاه حضية بويه من لعروسيين وكان فالامن بالاضافة الى ولاد ولد موسى. هادو بداو ينسقو مع عدد من ناس البوليساريو انطلاقا من اسبانيا.