منين جات هاد الجملة ديال ” تايحتافلو معانا عاد نحتافلو معاهم ” ؟ لي كايعاودوها بزاف ديال عباد الله ! طبعا مايمكنش تكون خرجات من فم شي انسان سعيد و ناجح فحياتو و مقبل على الحياة !

هاد الصباح لقيت راسي حالة فمي فالتلفزة كانتفرج فالاشهار ديال الشكلاط ! و قبل منو كنت كانشوف الاشهار ديال شي سوبر مارشي ففرانسا داير تخفيضات بمناسبة راس العام ! و قبل منو كنت كانتفرج فشي ماركة ديال الحلويات كاتعرض حلوياتها حتى هي فالتلفزة ! الاذاعات الاجنبية و Luxe Radio دياولنا كلهم مبرونشيين على احتفالات نهاية السنة و الكادويات و لابيش و لاداند ! كلشي خارج كونجي ! كلشي مفيجط ! كلشي باغي يدوز وقت مع عائلتو و حبابو !
وانا نتفكر شي وجوه لي عايشين معانا و لي فاش كاتسولو واش كاتحتافل بنهاية السنة كايعبس و كايجاوبك بواحد الجملة ” حتى يحتافلو معانا عاد نحتافلو معاهم ” هاد الجملة بالضبط لا شديتيها و حللتيها غادي تلقاها عامرة بالحقد و الاكتئاب و السم ! مستحيل السيد و لا السيدة لي قالوها النهار الاول يكونو اسوياء ! مستحيل مثلا نتخايل واحد سعيد فحياتو ! عندو حياة جنسية سوية ! حياة عاطفية سوية ! ما يكفي من المال باش يكون مرتاح يخرج هاد الجملة من فمو ! مستحيل شي حد بعقلو يوضع شرط للاحتفال و لي هوا فالاصل مصدر فرحة و سعادة و بارطاج مع الناس العزاز!
” تايحتافلو معانا عاد نحتافلو معاهم ” ! ” علاش هوما مايحتافلوش معانا ؟” ماغاتسمعش هاد الهضرة فالهند و لا فالصين و لا فالجابون لي فالاصل حتى هوما هاد الاحتفالات دخيلة عليهم ! و لكن غاتسمعها عندنا و عند خوتنا و بعجرفة !
بلا مانهضرو طبعا على اينا اعياد بغيتيهم يحتافلو بيها معاك و شنو هي مقومات الفرح و السعادة لي كاتبين عليها فهاد الاعياد هادا موضوع آخر!
ولكن لاكنتي بنادم و رافض الاحتفال ( و من حقك) و سولك ولدك هاد السؤال ديال ” علاش آ بابا حنا مامحتافلينش بنهاية السنة ” على الاقل ماتجاوبوش هاد الجواب الغبي ديال ” تايحتافلو معانا عاد نحتافلو معاهم”