نايضة فمجلس بنموسى. هادو ضد اعتقال عمر الراضي. بنالزين: ما كاينش شي نموذج تنموي بلا ضمان حرية التعبير.كسيكس: متابعة غير مناسبة. التازي: ها المتابعة سينيال خايب وخاص تتصحح بسرعة

قبل ما تبدا اللجنة اللي غادية توجد اش خاصنا فالمشروع التنموي٬ خلوتها بمدينة بنكرير نهاية الاسبوع بحضور رئيسها بنموسى والاعضاء 35 جات قضية اعتقال الصحافي عمر الراضي. اعتقال خلى اعضاء من هاد اللجنة يدينوه. يعتابروه معرقل كاع لخدمتهم. اشارة سلبية ضد حرية التعبير.
ادريس اكسيكس عضو اللجنة اعتابر ان هاد المتابعة داخلة فمنطق القمع التعسفي لنشطاء من قبل القضاء. واعتبر ان التعبير عن غضب عبر تويت =في اشارة الى تدوينة عمر الراضي= جابت ليه متابعة غير مناسبة من قبل النيابة العامة واعتقال غير مربح به”.
الكاتب رشيد بنالزين حتى هو عضو هاد اللجنة عبر على تضامنو مع عمر الراضي واكد ان اي نموذج تنموي ما يمكنش شي حد يدافع عليه بلا حرية التعبير والاخبار. واضاف ان التنمية يفتارض فيها النقد ونقاش الافكار وبلا هاد الشي ما كاينة تنمية.
اما الملياردير كريم التازي المعروف عليه دفاعو على حرية التعبير واللي حتى هو عضو فهاد اللجنة فاكد ان هاد المتابعة ضد عمر الراضي اشارة سلبية وخاص معالجتها بسرعة.
هاد الاراء ممكن تخلي الموضوع ياخد طريق اخر. هادي لجنة عينها الملك محمد السادس واعضاءها ضد متابعة الصحافي عمر الراضي.