مغاربة فجيانكَشي فالشينوا خايفين من “كورونا” وكيطلبو الملك يرجعهم للمغرب

طلقوا مجموعة من الطلبة المغاربة فجامعة جيانكَشي فالشينوا، لبارح الأربعاء، فيديوات لايف على مواقع التواصل الاجتماعي، كيناشدو فيها الملك محمد السادس باش يرجعهم للمغرب كيف ما دار مع طلبة مدينة ووهان، من بعد ما وصلوا عدد المصابين فيروس “كورونا” القاتل فجيانكَشي لأكثر من 500 حالة.
الطلبة، اللي كاينين فجيانكَشي اللي قريبة من مدينة ووهان اللي تفشا فيها الفيروس بشكل كبير، قالوا فاللايف أنهم محبوسين فالحرم الجامعي لعدة أسابيع، وهوما مطالبين باش يبقاو فيه لمدة تقدر تفوت شهر، والماكلة اللي عندهم تقدر ماتقدهومش.
وقالو الطلبة، فاللايفات اللي انتشرات بشكل كبير، بللي حاولو يقطعو البيي ديال الطيارة للمغرب ثلاثة ظيال المراتد لكن فكل مرة كيعلموهوم باللي هذ الرحلات تتلغات، حتى عرفو من بعد أن “لارام” علقات جميع رحلاتها للشينوا، وبللي غايبقاو حاصلين مازال حتى لشهر مارس.
وللإشارة، كانت “لارام” جابت، فطيارة خاصة وبمبادرة ملكية، كثر من 170 طالب مغربي من مدينة ووهان للمغرب الأحد اللي فات، لكن مازال مجموعة من المغاربة حاصلين فالشينوا من بعد ما علقات “لارام” رحلاتها لتماك، وخايفين من فيروس “كورونا”.