المغرب يمكن يعلن تعليق التظاهرات الثقافية والرياضية المبرمجة بسبب “كورونا”

من المرجح يلغي المغرب الأنشطة ديالو الرياضية والثقافية، فضلا عن إلغاء جميع التجمعات البشرية اللي كان من المبرمج عقدها، وكذلك إلغاء تدبيرو للرحلات “ذهابا وإيابا” للدول اللي منتشر فيها فيروس “كورونا” المستجد القاتل، وعلى رأسها الشينوا، وكوريا الجنوبية، والطاليان، وإيران، والجابون، وهذشي بعد توصيات اللجنة الوطنية للقيادة.
اللجنة الوطنية للقيادة، اللي تأسسات من بعد تفشي الفيروس فكَاع أنحاء العالم وإعلان حالة الطوارى من طرف منظمة الصحة العالمية، علنات، اليوم الأحد، بللي غاتابع الحالات ديال الإصابة بالفيروس والوفيات على المستوى الدولي، وبللي غادي تتخاد تدابير وقائية جديدة بالإضافة لتعليق الأنشطة والرحلات.
اللجنة، فبلاغ ليها، طلبات كذلك من المغاربة اللي رجعو من السفر من الدول الموبوءة، يتجنبو ما أمكن التجمعات البشرية، ويقلبو درجة الحرارة ديالهم بشكل يومي لمدة 14 ليوم، ويستشرو الطبيب إلا ظهرات عليهم أي علامة من علامات الإصابة بالمرض.
وغير اليوم، قدمات وزارة الصحة، من خلال ملصق وضعاتو فموقعها الإلكتروني، نصائح للمسافرين المغاربة اللي متوجهين للمناطق اللي كتعرف انتشارا “كورونا” المستجد (كوفيد 19).
وطلبات الوزارة من المسافرين يأجلوا السفر ديالهم للدول اللي منتشر فيها الفيروس إلا كانت رحلاتهم غير ضرورية، كيفما طلبات منهم إلى كانوا مضطرين يسافرو بالالتزام بشروط الوقاية والنظافة، وكذلك احترام التعليمات الصادرة من السلطات الصحية ديال البلاد اللي غيمشيو ليها.
ونصحات وزارة الصحة المسافرين المغاربة بتجنب الأماكن اللي فيها تجمعات، وتجنب الاحتكاك أو الاتصال المباشر مع الأشخاص اللي فيهم السخانة والرواح وكيكحو بزاف.
وبالنسبة لقواعد النظافة اللي نصحات بيها الوزارة المسافرين، فكتتمثل فغسل اليدين مزيان بالما والصابون وبشكل متكرر، وإلا استعمال المعقم المضاد للميكروبات، بالإضافة لتجنب لمس الأنف والفم في حالة عدم غسل اليد، وتغطية الفم والنيف بمنديل فاش يجيو يعطسو أو يكحو، والحرص على وضع الكمامات الطبية.