كيفاش حقوقيون ركبو مع الياس فتراكتورو بلا ما يدخلو للبام لقاوها فرصة للانتقام من بوعشرين والتاحقو ببنيات ووليدات لشكر. واحد تقدمي حداثي ومسمي راسو مولاي دار مبادرة مركز ايت يدر اللي مولاه اول واحد حذر من عودة سنوات الرصاص فهاد القضية

محاكمة الصحافي توفيق بوعشرين مدير نشر “اخبار اليوم” غادية تكون فاصلة. نعرفو ديموقراطيينا. نعرفو حقوقيينا. نعرفو المبدأ من الانتقام. شفنا كيفاش بنيات ووليدات ادريس لشكر اللي جابوه للكتابة الاولى للاتحاد الاشتراكي كيتحركو فهاد القضية. كانو نشيطات بزاف بلا ما ياخدو قرينة البراءة. ما عمرنا شفنا فمهم تحل فقضية لا سعد لمجرد لا قضية سليم الشيخ مدير “دوزيم” لا فقضية دانييل كالفان المغتصب اللي اغتاصب 11 طفل وخدا عفو ملكي قبل ما يتم تصحيح ما يتم تصحيحو وكان وصل المتهم لاسبانيا.
هادو ما هدروش على عدد البوليس ومدى قانونية هاد العدد فاعتقال او استدعاء الصحافي. ما هدروش علاش الساروت ديال المكتب خداوه واش كان اذن من الوكيل العام واش القضاء هو اللي سمح بيه ولا سمح بيه واش كاين حكم قضائي ولا اللا. ركزو على المشتكيات عندهم هما الضحايا. هادو كان ممكن نحتارموهم لو انهم دافعو على قضاء نزيه لا تشوبه شائبة. نزاهة القضاء هي اللي غادية تعطي لكل واحد حقو.
اليوم جات مبادرة غريبة. مبادرة لواحد كانت اخبار اليوم” كتبات عليه وقالت باللي شارك فمسيرة ولد زروال او لعب دور فيها وهو احمد الدريدي اللي كيقول مع جميعات حقوقية وخدام فجمعية محاربة السيدا. هاد السيد اللي ركب مع الياس العماري فالتراكتور ديالو بلا ما يلتاحق بيه كاليك طلق مبادرة تضامن مع ضحايا بوعشرين.
الدريدي اليساري جدا حتى انو ما كيوقع الا ب”مولاي احمد” في اشارة الى فكر متخلف تقليداني كيقسم المغاربة الى شرفاء او نبلاء وباقي المواطنين. هاد المبادرة فيها رد بشكل غير مباشر على تصريح بنسعيد ايت يدر يوم تقديم مذكرات عبد الرحمان اليوسفي. قال ايت يدر باللي كاين تراجع فالمغرب وباللي هاد الشي كيخلع ديال اعتقال بوعشرين وباللي كنا قطعنا مع سنوات الرصاص قبل ما يفكرنا هاد الشي بيه. هاد الدريدي وغيرو بغاو يردو عليه.
كاين المبدأ وكاينة الانتهازية وتصفية الحسابات. قرار النقابة الوطنية للصحافة المغربية اكثر القرارات حكمة. هادا صحافي والمشتكيات والمصرحات صحافيات. باش تخرج النقابة بلاغ كتقول باللي كاينة قرينة البراءة وباللي غادية تاخد الموقف المناسب فالوقت المناسب راه كان اكثر المواقف ذكاء. اما اللي باغي يقضي على بوعشرين قبل حتى ما تبدا المحاكمة راه كيسيء لراسو ماشي لشي حد. قضية بوعشرين محك كبير لينا فالمغرب. نعرفو فين غاديين. المؤمل هو تكون محاكمة يقبلها كلشي ما يحتج عليها حد لعيوب فالشكل او ضغوط او تهييج كيف كيوقع دابا. ماشي بحال هاد الشي يربح اللي كيسميو ريوسهم التيار الحداثي التيار المحافظ.