تمديد المداولة فقضية عمر الراضي وتحديد تاريخ النطق بالحكم ف17 مارس

مددات المحكمة الابتدائية الجزرية ديال عين السبع فكازا النظر فقضية الصحافي عمر الراضي، وحددات تاريخ 17 مارس للحكم فالقضية.
الراضي متابع فحالة سراح بتهمة “إهانة القضاء”، بعدما نشر تغريدة على موقع التواصل الاجتماعي “تويتر”، كينتقد فيها الأحكام الصادرة فحق المعتقلين ديال الريف.
وفالجلسة السابقة ديال الخميس اللي فات، واللي دامت ساعات طويلة قبل ما يدخل القاضي الملف لمرحلة المداولة والتأمل استعدادا للنطق بالحكم، أكدات النيابة العامة بللي الراضي استعمل كلمة “الجلاد” فالتدوينة، وهي عبارة “مهينة للقضاء” حسبها.
وتشبث الراضي ببراءتو فالقضية، واعتبر راسو “غير مذنب”، كيف دافع، خلال كلمة ليه أمام المحكمة فالجلسة السابقة، على حقو فالتعبير بكل حرية وإبداء وجهة نظرو فقضية الريف والأحكام الصادرة فيها.
من جهتو كان الدفاع ديال الراضي اعتبر بللي محاكمة ديالو بالقانون الجنائي ماشي معقولة، وبللي خاص النيابة العامة تتابعو بقانون الصحافة بحكم أنه صحافي.