مصدر من القوات المسلحة ل”كود”: المؤسسة العسكرية دايرة احتياطاتها باش ماينتشرش “كورونا” فالقشالي

عرفات “كود” من مصدر مطلع بللي القوات المسلحة الملكية دايرة إجراءات وقائية صارمة للوقاية من فيروس “كورونا” المستجد ومنع انتشارو فصفوف العسكر وفالتجمعات اللي كيديروها، وخصوصا فالفترة الصباحية اللي كيتجمعو فيها باش يديرو تحية العلم يوميا وفكَاع القشالي فالمغرب.
وأكد مصدر من القوات المسلحة الملكية، فحديثو مع “كود”، بللي مكاينة حتى شي مؤسسة فالدولة مدايراش احتياطاتها باش تمنع انتشار الفيروس، وكتنفذ الإجراءات اللي دعات ليها وزارة الداخلية ووزارة الصحة، بحال منع التجمعات اللي كتفوت 50 شخص، والالتزام بشروط النظافة، والحرص على التعقيم.
وامتنع المصدر على التفصيل فالإجراءات اللي كتخاد، بحكم أنها أمور كتبقى “كونفيدونسييل”، وقال: “ممكن الحاجة اللي كتهم الرأي العام أكثر هي إلى أمرنا الملك محمد السادس باش نتدخلو باش نسعفو حالات مصابة ونقلوها، لكن الحديث على ما هو داخلي كايبقى سري شوية، وهذشي ماشي عندنا بوحدنا، لكن على الصعيد العالمي ككل”.
وزاد كيقول بللي القوات المسلحة الملكية متبعة كَاع الأحداث المتعلقة ب”كورونا”، وبللي “عندنا عليها علم، ومتبعين التطورات ومواكبينها “آجور”، ومستعدين للتدخل فكل أمر ملكي باش نحميو البلاد من الفيروس الخبيث”، على حساب هضرتو.