سويعات قبل حالة الطوارئ الصحية.. الوزارات والمؤسسات العمومية والخصوصية بدات توجد تراخيص الخروج للخدمة للموظفين والأجراء

الداخلية سهلات المأمورية للي خدامين باش يمشيو لخدمتهم بشكل اعتيادي، يعني عوض ما يتسناو لمقدم يسني ليهم ورقة الخروج للعمل كل يوم، غيمكن ليهم يعتمدو ترخيص مسيني وموقع من الباطرون ديالهم.
القطاعات العمومية سارعات باش تدير نماذج ديال هذ التراخيص وتعطيهم للموظفين ديالها، باش يعتمدو عليه من أجل الذهاب للعمل، بلا مايتسناو عون السلطة.
الوزارات كذلك وجدات ورقة موحدة ديال شهادة التنقل الاستثنائية تعممات على جميع الوظفين فكَاع القطاعات الوزارية، وبلونطيط ديال الوزارة الوصية.
كذلك كاينين شركات ومؤسسات فالقطاع الخاص، سارعات باش تمكن العمال ديالها والأجراء من الوثيقة، ورسلاتها عبر الإيمايلات ليهم باش يطبعوها ويعتامدوها باش يجيو للخدمة.
والداخلية ماحكراتش بالزاف فشكل هذ الترخيص ومضمونو، لكن ضروري يشمل كاع المعطيات المتعلقة بالأجير أو الموظف، وعنوانو وعنوان مقر العمل، وتكون حاملة ختم المؤسسة وتوقيع المسؤول الإداري فيها، وماكاين لاش يسنيها المقدم.
وفرضات الداخلية هذ وثائق التنقل على العاملين فحالة ما كان العمل ديالهم كيلزمهم يتنقلو للمقر، ومكانتش إمكانية فيه ديال العمل عن بعد، وهذشي باش تقنن التنقلات ديال الأفراد وتنقص منها فحالة الطوارى الصحية، باش تحد من انتشار وباء "كورونا" المعدي اللي قتل الآلاف عبر العالم.