المغاربة حاصلين فتونس بعد تعليق الرحلات الجوية.. والسفارة : “غانأمنو ليهم رحلات خاصة”

بزاف دالمغاربة بقاو حاصلين فتونس، وخصوصا فيهم اللي ماساكنينش فيها، ومشاو غير باش يقضيو شي صوالح أو لغرض السياحة أو العمل، وحصلو منين تعلقو الخطوط الجوية المغربية.
السفارة المغربية فتونس دخلات على خط هذ الحصلة ديال المغاربة فالأراضي التونسية، وعلنات بللي هي على تواصل دائم مع السلطات المغربية باش تأمن العودة ديالهم فطائرات خاصة فأقرب الآجال.
ودارت ليهم السفارة واحد اللائحة خدات فيها كَاع المعطيات عليهم، وحددات الناس اللي الحالة ديالهم مستعحلة باش تسبقهم هوما اللوالا.
وعلنات بللي لجنة التتبع ديال السفارة توصلات باتصالات كثيرة ديال هذ المغاربة، وقدرات أنها تدبر سفر ورجوع العديد منهم قبل، وهذشي عبر الرحلات اللي تبرمجات فالفترة اللي تعلن عليها القرار ديال تعليق الرحلات إلى دخولو حيز التنفيذ.