علاش هزو الوزير عمارة للصبيطار.. مصدر طبي ل"كود": المذكرة الوزارية لزمات المراقبة الطبية للمصابين ب"كورونا" جوج مرات فالنهار

لبارح الثلاثاء، هزو عبد القادر عمارة، وزير التجهيز والنقل واللوجستيك والماء، للصبيطار ميليتير فالرباط، باش يكمل العلاج ديالو تماك، لكن واش هذشي تدار حيت الحالة الصحية ديالو تدهورات بالصح، أو لسبب آخر؟
مصدر طبي وضح ل"كود" بللي وزير الصحة صدر لبارح مذكرة وزارية حدد فيها بروتوكول جديد ديال تشخيص وعلاج الحالات المصابة بفيروس "كورونا" المستجد.
وقال بللي المصابين بحال الوزير عمارة، اللي الإصابة دياله طفيفة ولا متوسطة، لازم يستفدو من المراقبة الطبية جوج مرات فالنهار، وبشكل إلزامي، باش يتم تشخيص أي مضاعفات يقدر يتسبب فيها الفيروس.
وأكد مصدر "كود" بللي كيخص المعلومات اللي تم استنتاجها من خلال المراقبة يتم وضعها، بشكل إجباري، فالدوسيي ديال المريض.
والمريض قبل ما يدخل للصبيطار، كيقول المصدر بللي خاص ضروري تدار ليه، وعلى الأقل تحليلة شاملة ديال الدم، وتحليلة البروتين فالدم، والسكر، والبول، ويدار ليه الراديو دالصدر، وتخطيط القلب. وخاص يدار ليه تقرير عند ولوج المستشفى.
ومصدر كيقول بللي مايمكنش يبقى عمارة فالدار ديالو، و"غيخصو يكون فالصبيطار باش تدارليه مراقبة يومية، ويتم تتبع الحالة ديالو، ويتعطى ليه دوا "الكلوروكين" بشكل منتظم، وهو الدوا اللي ولا ممنوع يتعطى أو يتاخذ خارج الصبيطارات"، على حساب هضرتو.