الفايد شوه بينا ودار فينا الضحك قدام العلماء ديال العالم.. الشعوذة والقضاء على كورونا مكايتلاقاوش.. ونظرية "صومو تصحو" منافعاش مع وباء قاتل مية ألف واحد عبر العالم

شوه بينا محمد الفايد وبهدل بالعلما دالمغرب، السيد كيداعي وصولو للعلاج ديال كورونا المستجد، وكيهضر وبواحد الثقة فنفس عالية وكبيرة، لاعب بيها على جوج أوتار حساسة عند الناس، وتر قلة الوعي والجهل بخطورة الفيروس فخضم هذ شلاضة دالاخبار الزائفة اللي كتروج وغياب ضعف تواصل الجهات المختصة، ووتر الدين اللي كيسهال عليه بيه يتحكم فعقول الناس ويخليهم يتيقوه صحا.
الفايد داز فبرنامج "استوديو الجزائر" على القناة الجزائرية "البلاد نيت"، لبارح السبت وحشم بينا تحشيمة عالمية على مستوى دول الشرق الأوسط وشمال أفريقيا، الفايد قال كلام ماعندوش أساس علمي، واستعمل الشعوذة بمختلف أصنافها باش يبان عندو عصا سحرية يقدر يخلص بيها البشرية من هذ الوباء، فالوقت اللي علماء كبار طاحو ليهم السنان فالأبحاث والتجارب الإكلينيكية كيأكدو أن كورونا ماعندو علاج، وكيشكل تهديد حقيقي على البشرية.
الفايد واقيلا كيضحك على الناس ولا كيستهزأ بيهم، قاليك ا سيدي فرمضان كورونا موحال واش يبقالو شي أثر فالدول المسلمة، حيت الصيام كيقوي المناعة ضد الفيروس، وكيخص المريض أو اللي ماباغيش يمرض بالفيروس يصوم النهار كامل، وفالليل ياكل قياسو، ويعتمد فقط على المأكولات النباتية والماكلة ديال الدار، ويتجنب الماكلة الاصطناعية واللحم.
وباش كملها وجملها قاليك الإنسان إلى شك فالفيروس دخل ليه لكًجوطتو يشلل بالما والقرفة والقرنفل، ويدير عملية الاستنشاق والاستنثار فالنيف باش إلى بقا شي فيروس واحل ليه يخرج بسرعة، وقال بللي هذ العملية فعالية بحكم المزايا عديدة ديال القرفة والقرنفل فمحاربة الفيروسات.
الفايد واقيلا كيضحك على الوقت، ولا كيحرض الناس على عصيان قرارات السلطات، فعوض ما ينصحهم باش يكَلسو فديورهم ومايتزعزعوش منهم إلا للضرورة القصوى، وعوض ما يطلب منهم يوضعو الكمامات، صافي كيقول ليهم "صومو تصحو وشللو بالقرفة"، أما النصائح اللي عطات وزارة الصحة وقبل منها منظمة الصحة العالمية دالوقاية من الفيروس هي بالنسبة ليه غير زايدة، والمهم هو الصيام والقرفة والغذاء النباتي.
كاين احتمال يكونو بحال هذ الناس اللي كيمارسو الشعوذة بطرق أكثر احترافية كيضحكو على الناس، أو كيقلبو على الهلاك ديال الأمة خصوصا وأنهم عارفين أن عندهم متابعين ومعجبين ومن السهل السيطرة عليهم، كيف ممكن يكونو هذ الناس واقيلا كبرو وخرفو، ومع مولفين يخشيو نيفهم فكلشي كَلسو يخرفو على الناس ويديرو فينا الضحك قدام العلما دالعالم.
بغينا غير نقولو للسي الفايد بللي الشعوذة والقضاء على كورونا مكايتلاقاوش، ونظرية "صومو تصحو" منافعاش مع وباء قاتل مية ألف واحد عبر العالم وحارو معاه كبار العلما اللي قراو الطب حتى سخفو، ودارو تجارب وأبحاث لا حصر لعددها، عاد تجي نتا ماعرفت منين توريهم شغلهم؟