عاجل.. مستشار استقلالي وصحفي "مزيف" وجمعوي هبطو للحبس حقاش خرقو حالة الطوارئ الصحية

علمت "كود"، من مصدر مطلع، أن وكيل الملك لدى المحكمة الابتدائية بمدينة فاس، قرر زوال اليوم الإثنين، متابعة ثلاثة أشخاص، من بينهم صحافي "مزيّف"، في حالة اعتقال احتياطي، مع إحالتهم جميعا على جلسة اليوم.
ووفق ما كشف عنه مصدر "كود"، فإن هاد الموقوفين حصلو خارقين حالة الطوارئ الصحية من قبل السلطات المحلية بالملحقة الإدارية "القرويين"، اللي تابعة للمنطقة الحضرية فاس المدينة، وبلا حيا بلا حشما قاليك شي حد فيهم كيدير المراقبة على السلطات كيفاش خدامة.
وماشي غير هادشي. واحد فيهم قاليك صحفي وكيواكب العمليات اللي كتديرها السلطات على حالة الطوارئ. السيد معندو علاقة بالصحافة وكان كيخدم ف الحفلات ودبا رجع صحفي. زمان وشمن زمان هذا وصلنا ليه. وللإشارة راه كاين عدد كبير منهوم مزالين ومعروفين.
هاد الصحفي "المزيف" وجهات ليه النيابة العامة تهمة "انتحال صفة ينظمها القانون". وهاد رسالة لأي واحد معندو بطاقة صحافي مهني اللي صادرة عن المجلس الوطني للصحافة يرد بالو. راه مابقاش داك الوقت اللّي كيعرفو. اللي حصل يهبط للحبس.
هادشي اللّي وصلنا ليه عندو علاقة بتراكمات تسببت فيها بزاف ديال الجهات بمدينة فاس. دبا المدير العام للأمن الوطني اصدر تعليمات صارمة وواضحة للمسؤولين باش يردو بالهوم مع هاد الفئات. ودبا النيابة العامة دايرة خدمة زوينة باش تقضي عليهوم.