سجل موقع "وورلد ميتر" المختص فالإحصاءات، واللي مكلف برصد آخر المعطيات بخصوص الحالة الوبائية ديال فيروس كورونا المستجد عبر العالم، ارتفاع ملحوظ فنسبة الإصابات والوفيات وحالات الشفاء بالفيروس. فالعالم كلو، واستنادا لآخر الإحصاءات اللي تعلن عليها لبارح كاينة 2 مليون و181 ألف و308 إصابة، من ضمنها 145 ألف و470 حالة وفاة، و547 ألف و69 حالة شفاء. أرقام مثيرة دالإصابات والوفيات ميريكان مازالة متصدرة اللائحة فعدد الإصابات، وفايتة الدول الأخرى اللي موراها بأكثر من 500 ألف إصابة، غير فهذ 24 ساعة اللخرا سجلات ميريكان 29 ألف و567 إصابة جديدة، باش يوصل الطوطال دالإصابات ل677 ألف و570. ميريكان كذلك حققات أعلى نسبة دالوفيات فهذ 24 اللخرة وحتى فالطوطال، ميريكان سجلا بألفين و174 وفاة بالفيروس، وفالطوطال عندها 57 ألف و508. فرانسا واخا جايا هي الرابعة، من بعد سبانيا وإيطاليا، كاتبان بللي غادية بواحد السرعة كبيرة وتقدر تفوتهم بجوج، 17 لألف و164 هو عدد الإصابات اللي سجلات غير اليوم، باش يوصل عدد المصابين عندها فالطوطال ل165 ألف و27، وتقرب بهذ الرقم للطاليان اللي عندهى 168 ألف و941 إصابة. ثاني أعلى معدل ديال الوفيات اللي تحقق فهذ 24 ساعة سجلاتو بريطانيا اللي كتجي فالمركز السادس ب103 ألف 93 إصابة، سجلات فالوفيات 861 وفاة، وباش يولي العدد الإجمالي للوفيات عندها هو 13 لألف و729 وفاة. الشينوا، اللي جا منها الفيروس وكانت فالسابق بؤرة ليه، واللي هبطات للمركز السابع عالميا، فهذ 24 ساعة اللخرة سجلات غير 46 إصابة، باش يوصل عدد الإصابات عندها فالطوطال ل82 ألف و341، أما فالوفيات فماتسل عندها والو، وبقى العدد هو 3 آلاف و342. دول مسجلة أعلى نسب الشفاء ولدفع التشاؤم، دارت "كود" قراءة فالأرقام المتعلقة بأعلى معدلات الشفاء اللي حققوها الدول اللي عندهم إصابات كبيرة، وفهذشي كاتجي الشينوا فالمركز الأول ب77 ألف و892، وبالتالي كيبقى ليها غير ألف و107 ديال المصابين فالمستشفيات. وكتتبع الشينوا فأعداد الشفاء ألمانيا، اللي كتحتل المركز الخامس فالترتيب، واللي عندها 77 ألف حالة شفاء، وبالتالي كيبقاو 56 ألف 646 حالة فالمستشفيات، من أصل 137 ألف و698 إصابة وفالمرتبة الثالثة، كاتجي سبانيا ب74 ألف و797 حالة شفاء، باش يبقاو ليها 90 ألف و836 كيتعالجو، من أصل 184 ألف و948 حالة فالطوطال.
