المغرب جا فالرتبة 26 ضمن الدول الناشئة اللي قدرات تواجه كورونا

جا المغرب فالمرتبة 26 من بين الدول الناشئة والدول فطور النمو اللي قدرات تواجه فيروس كورونا المستجد.
هذ التصنيف، اللي وضعاتو مجلة "ذا إكونوميست" البريطانية، كيخص 66 دولة، تحددات باعتماد نسبة الديون والكريديات اللي عليها.
والمغرب جا فالمرتبة الرابعة فهذ الترتيب على مستوى دول الشرق الاوسط وشمال أفريقيا، سابقاه السعودية اللي جات فالمرتبة 8، والإمارات فالمرتبة 17، والكويت فالمرتبة 22.
وبالنسبة لمؤشر الديون والاقتراض اللي حددو التصنيف بالألوان، الدين العام دالمغرب مرتفع شوية، الدين الخارجي متوسط، والمدفوعات للدول دبرا متوسطة حتى هي، ونسبة الاقتراض عندو مزيانة، وهذشي اللي حدد المرتبة ديالو.
وعلى المستوى القاري جا المغرب فالمركز الرابع عاوتاني، فايتاه بوتسوانا اللي جات هي اللولة فالتصنيف، تابعاها نيجيريا فالرتبة 14، والكوت ديفوار فالمركز 24.
وعالميا بوتسوانا هي اللولة، فالمركز الثاني جات الطايوان، وفالمركز الثالث كتجي كوريا الجنوبية.