ثمان الخضرة واللحم طاح باستثناء البصلة اللي غلات شوية.. هذو تفاصيل أسعار الخضر والفواكه فسوق الجملة فكازا

هذ السيمانة عرفات الأثمنة ديال الخضرة واللحم بلكَرو شوية ديال الانخفاض، أما ثمن الديسير فماتبدلش بزاف، وأغلبية أثمنة الفواكه بقات هي هي مقارنة مع السيمانة اللي فاتت.
بحال العادة كل أربعاء، دار سوق الجملة للفواكه والخضر التابع للمجلس الجماعي لمدينة كازا ليست جديدة ديال الأثمنة الخاصة بالمنتوجات الفلاحية اللي كيتباعو بالكَرو لهذ السيمانة، باش يحدد السقف ديال الأثمنة والثمن الأدنى ديالها حسب جودتها كل منتوج، باش ماتكون حتى شي زيادة فهذ الوقت اللي كتعرف البلاد حالة طوارئ صحية بسبب فيروس كورونا المستجد.
بالنسبة لثمن اللحم بالجملة فالباطوار ديال كازا، فمزال مستمر فالانخفاض بحال السيمانة اللي فاتت، لحم الغنمي ولا يدير دابا فالثمن الأدنى 48 درهم والثمن الأقصى 51 درهم للكيلو، والبكَري الثمن ديالو الأدنى ولا حتى هو 48 درهم، والثمن الأقصى 55 درهم للكيلو، بمعنى أثمنة اللحم هذ السيمانة طاحت بين 2 دراهم ودرهم.
وبالنسبة للخضر فالثمن ديالها حتى هو نقص شوية فحدود 2 دراهم حتى ل50 سنتيم فكل نوع، باستثناء البصلة اللي عرف ثمنها ارتفاع طفيف.
وحدد السوق الأثمنة ديال الخضرة الأساسية بالكيلوكَرام ف: ماطيشة 90 سنتيم فالثمن الأدنى و2.20 دراهم فالثمن الأقصى، وخيزو 80 سنتيم فالثمن الأدنى و1 درهم و80 سنتيم فالثمن الأقصى، البصلة 3 دراهم ونص فالثمن الأدنى و5.50 دراهم فالثمن الأقصى، باطاطا 1 درهم ونص فالثمن الأدنى و2.30 دراهم فالثمن الأقصى، البصلة الخضارية 1 درهم فالثمن الأدنى و2 دراهم فالثمن الأقصى.
وبالنسبة للخضر لخرى، فالمكور أو الكرومب كيدير 70 سنتيم فالثمن الأدنى و1 درهم و20 سنتيم فالثمن الأقصى، والكَرعة الخضرة كتدير 2 دراهم فالثمن الأدنى و3.50 دراهم فالثمن الأقصى، والخيار درهم ونص فالثمن الأدنى و2.30 دراهم فالثمن الأقصى، والدنجال درهم و80 سنتيم فالثمن الأدنى و2.80 فالثمن الأقصى، والكَرعة الحمرا 2 دراهم فالثمن الأدنى و4 دراهم فالثمن الأقصى.
أما بخصوص الفواكه، لافوكا كدير 13 لدراهم فالثمن الأدنى و28 درهم فالأقصى، البانان داير 8 دراهم الثمن الأدنى و11 الثمن الأقصى، البنان دالبلاد 5 دراهم فالثمن الأدنى و7 دراهم فالثمن الأقصى، الليمون 3 دراهم ونص فالثمن الأدنى و4 دراهم و80 سنتيم فالثمن الأقصى، والتفاح دالبلاد 4 دراهم الثمن الأدنى و7 دراهم ونص الثمن الأقصى، والتفاح المستورد 6 دراهم ونص الثمن الأدنى و12 درهم ونص الثمن الأقصى، والدلاح 1 درهم و30 سنتيم أقل ثمن و2.80 دراهم الثمن اللي طالع.