يا اللي طالب الزيادة رد بالك من النقصان.. وزارة الصحة عوض تقادها زادت خربقتها فالموقع ديالها.. دابا المواطن خاصو كالكيلاتريس لا بغى يعرف شحال من اصابة بكورونا كاينة فجهتو

مند بداية جايحة فيروس كورونا المستجد فالمغرب، والمغاربة كيتسناو من وزارة الصحة تواصل معاهم احسن وبوضوح اكثر، وعوض ماهادشي اللي يوقع، هاد اليوماين الوزارة قررات تزيد تعقد الامور عليهم.
وبلا سابق انذار، حيدات الوزارة عدد الاصابات حسب الجهات، وعوضاتو بتوزيع الاصابات فالجهات بالنسبة المئوية. دابا المغاربة ولاو كيحلو موقع "كورونا" ومعاهم آلة حاسبة، باش يضربو النسبة المئوية فعدد الاصابات الإجمالي ويقسموها على 100 باش تعطيهم شحال عندهم من حالة فمنطاقتهم، والعدد اللي كيلقاو ماعندو علاقة بداكشي اللي كينشروه المديريات الجهوية.
فاش كضرب دويرة فمواقع تتبع الحالة الوبائية ديال دول أخرى، كيبقى فيك الحال وكتشدك الدوخة، من قوة المعلومات اللي متوفرة للمواطنين. فرنسا مثلا كتعطي عدد الأسرة، عدد الحالات في الانعاش وزيد وزيد..
هنا في المغرب ولفنا السيستيم ديال "بريكولي للراسك"، النهار كامل والمواطن كيقلب على المعلومة لراسو، لابغى يعرف سرعة انتشار الفيروس R0 كيقلب فجهة، لا بغى يعرف شحال من واحد فالانعاش كيمشي لجهة اخرى، وباش يعرف معلومات أخرى بسيطة خاص يتسنى محمد اليوبي يقولهوم ليه فالندوة، وشوف تشوف مرة يقولهم ومرة لا، على حساب گانة الوزارة.
علاش مايكونش عندنا موقع كامل متكامل، فيه گاع المعلومات اللي باغيها المواطن فهاد الجايحة، باش على الأقل يكون على دراية بالوضع ويرتاح معنويا ولو غير حيت وزارتو محتارماه وعاطياه المعلومة بلا مايحتاج يقلب عليها هنا ولهيه وشي يلقاه وشي لا.
هادي بعض المعلومات اللي فنظرنا ضروري تكون فموقع "كورونا":
– عدد الإصابات بكورونا حسب الجهات، والمدن، والاحياء
– توزيع الحالات حسب الجنس والفئات العمرية
– تبيان تطور الحالات المؤكدة، والشفاء، والوفيات
– تبيان تطور مؤشر سرعة انتشار الفيروس R0
– تبيان تطور الحالة الوبائية في المغرب مستقبلا حسب موديل من الموديلات المستعملة بحال SIR
– عدد المخالطين تحت المراقبة
– عدد المصابين في حالة خطيرة و/ او في الانعاش
– عدد الحالات تحت العلاج