الخضرة رجعات تغلا من جديد هذ السيمانة ولافوكا وصلات ل35 درهم.. هذو تفاصيل أسعار الخضر والفواكه واللحم فسوق الجملة فكازا

بحال العادة كل أربعاء، دار سوق الجملة للفواكه والخضر التابع للمجلس الجماعي لمدينة كازا ليست ديال الأثمنة الخاصة بالمنتوجات الفلاحية اللي كيتباعو بالكَرو فهذ السيمانة، باش يحدد السقف ديال الأثمنة والثمن الأدنى ديالها حسب جودة كل منتوج، باش ماتكون حتى شي زيادة فهذ الوقت اللي كتعرف البلاد حالة طوارئ صحية بسبب فيروس كورونا المستجد.
لافوكا هي الوحيدة اللي عرف ثمنها زيادة كبيرة هذ السيمانة، بالإضافة لبعض الخضر اللي حتى هي ثمنها تزاد شوية، ولحم البكَري اللي طلع بجوج دراهم
بالنسبة لثمن اللحم بالجملة فالباطوار ديال كازا، فلحم الغنمي نخفض ثمنو شوية ولا يدير دابا فالثمن الأدنى 45 درهم والثمن الأقصى 51 درهم للكيلو، والبكَري طلع الثمن ديالو الأدنى ولا حتى هو 50 درهم، والثمن الأقصى بقى مستقر ف55 درهم للكيلو.
بالنسبة للخضرة، الأثمنة ديالها بقات مستقرة، باستثناء بعض الخضر اللي عرفات زيادات طفيفة، وهكذا حدد السوق الأثمنة ديال الخضرة الأساسية بالكيلوكَرام ف: ماطيشة 1 درهم ونص فالثمن الأدنى و3.20 دراهم فالثمن الأقصى، وخيزو 1 درهم و10 سنتيم فالثمن الأدنى و1 درهم و80 سنتيم فالثمن الأقصى، البصلة 3 دراهم ونص فالثمن الأدنى و5.50 دراهم فالثمن الأقصى، باطاطا 1 درهم و70 سنتيم فالثمن الأدنى و2.30 دراهم فالثمن الأقصى، البصلة الخضارية 80 سنتيم فالثمن الأدنى و2 دراهم فالثمن الأقصى.
وبخصوص الخضر لخرى، فالمكور أو الكرومب كيدير 70 سنتيم فالثمن الأدنى و1 درهم و20 سنتيم فالثمن الأقصى، والكَرعة الخضرة كتدير 2 دراهم فالثمن الأدنى و4 دراهم فالثمن الأقصى، والخيار 2 دراهم فالثمن الأدنى و3 دراهم فالثمن الأقصى، والدنجال درهم و80 سنتيم فالثمن الأدنى و2 ونص فالثمن الأقصى، والكَرعة الحمرا 2 دراهم فالثمن الأدنى و4 دراهم فالثمن الأقصى.
أما بالنسبة للفواكه، عرفات استقرار فالأثمنة، باستثناء لافوكا الي غلات بزاف بالمقارنة مع قبل، ولات كتدير فالثمن الأدنى 25 درهم، والثمن الأقصى 35 درهم، أما الفواكه الأخرى فالبانان دبرا داير 8 دراهم الثمن الأدنى و11 الثمن الأقصى، البنان دالبلاد 5 دراهم فالثمن الأدنى و7 دراهم فالثمن الأقصى، الليمون 3 دراهم ونص فالثمن الأدنى و4 دراهم و80 سنتيم فالثمن الأقصى، والتفاح دالبلاد 5 دراهم الثمن الأدنى و8 دراهم ونص الثمن الأقصى، والتفاح المستورد 6 دراهم ونص الثمن الأدنى و12 درهم ونص الثمن الأقصى، والدلاح 1 درهم ونص أقل ثمن و3.20 دراهم الثمن اللي طالع