لاح مشاش فبلاصة بعيدة بشكل "همجي" وعاد زايدها بالسبان وتخسار الهضرة.. جمعية للرفق بالحيوان فتطوان كتستنكر تصرف رضوان بن عبد السلام مع الحيوانات – فيديو

فيديو للداعية رضوان بن عبد السلام انتشر بشكل كبير على مواقع التواصل الاجتماعي، كايغوت فيه ويخسر فالهضرة بطريقة اعتبرها بعض النشطاء "بالهمجية"، و"المتناقضة تماما مع الصورة اللي كايعطي ويسوق على راسو كشيخ كايعرف بينو وبين الله".
جمعية دالرفق للحيوان فمدينة تطوان خرجات توضح حقيقة هذ الفيديو المنشور، وقالت فبلاغ ليها فصفحتها الرسمية على موقع التواصل الاجتماعي "فيسبوك" بللي بن عبد السلام تشاد مع واحد من أعضاء الجمعية، بعدما حصلو غادي يلوح شي قطيطات صغار فمكان خالي، باش يتهنى منهم.
سب وشتم والسبب… نصيحة !???????? تحذير الفيديو يحتوي على كلمات نابية…
Publiée par Association Paws Of Morocco – جمعية براثن المغرب sur Lundi 25 mai 2020
جمعية "براثن المغرب" وضحات بللي حالة القطوط كانت مكرفصة بزاف، ومللي حاولو أعضاء الجمعية ينبهوه باللي الفعل اللي كيقوم بيه ماشي مزيان و"حرام"، بدا يغوت عليهم ويقول "أنا ما كانعرف لا دين لا والو"، وبدا يسب فيهم ويخسر فالهضرة كيف ما كايبان بشكل واضح فالفيديو.
الجمعية كشفات بللي هذشي وقع ولبارح الإثنين، يعني فنهار ثاني عيد، وبن عبد السلام لاح القطوط فمطرح "العوينة" اللي فيه غير الخلا والقيفار، واللي القطوط اللي كاتجي ليه كاتموت فأيام قليلة، بسبب تلوث المكان، وحيت ماكاتلقى فيه ما تاكل ما تشرب.