حرب التسريبات. بلاصت متجاوبو واش رئيس الحكومة مصرح بالمستخدمين فالعيادة ديالو مشيتو لمستوى حقير فالتوظيف الأخلاقي فمواجهة معارض حيث بطل ف"البوكر" بحال ولد يتيم

حرب التسريبات بدات قبل مناقشة القوانين الانتخابية، شي كيضرب شي، خصوصا بين الاتحاد الاشتراكي والاحرار من جهة، والبي جي دي من جهة اخرى. خصوصا بعد فضيحة عدم التصريح بالمستخدمين ف CNSS من قبل وزراء العدالة والتنمية.
لكن الغريب ف الأمر هو التوظيف الأخلاقي الديني لبعض الأمور، كيفاش البي جي دي باغين يضربو الخصوم ديالهم بالتوظيف الاخلاقي، بحال هادشي لي باغين يديريوه مع مولاي هشام المهاجري، رئيس لجنة الداخلية بمجلس النواب.
الحقارة هي هادي، باش تمشي تجبد لي فين كايلعب البوكر، وعلاش مصنف من الأوائل لي كيلعبوه فالمغرب، ويكون كاع بطل. بصحتو. وعلاش نتوما سكتو ف قضية ديال ولد يتيم لي هو بطل فالبوكر، وتاهي حرية شخصية ومن حقو وبصحو، لكن هاد الخطاب الأخلاقوي والاسلاموي كيأكد أنكم بغيتو ديرو اسلمة الدولة والمجتمع.
دبا المهاجري، بلاصت ماتوجهوش ليه انتقادات كيفاش طلع وتنتخب ف حزب كولشي عارف قصتو، حزب كاتوصفوه بحزب التحكم وبالحزب لي استعمل الادارة والسلطة باش يحقق نتائج وفق تصريحاتكم، معندكمش الحق تهاجموه بهاد الطريقة.
الجواب لي خصكم تعطيهو هو واش العيادة ديال العثماني مصرحة بالمستخدمين لي فيها، ولا لا. جواب بسيط.
مستوى منحط من البي جي دي.. كيبين انه تالف. وغير قادر يعطي اجوبة للرأي العام.