مافهمتش كيفاش المغاربة أنانيين وكيقدسو الحولي كثر من حياتهم وحياة عائلاتهم.. وهانيا واخا يديرو الكسايد ويموتو بكورونا ويقتلو واليديهم.. المهم هو الشوا وبولفاف

ما فهمت والو أنا !! كيفاش الكائن المغربي عندو هانية يمرض ويموت بكورونا ويقتل واليديه.. هانيا يتزاحم فالطرقان ويدير الكسايد ويعرض حياتو وحياة اللي معاه للخاطر.. هانيا يخرج على القوانين اللي دايراها الحكومة ويدخل للحبس كَاع.. لكن إلا بولفاف !! حتى لبولفاف مستعد يضحي بأي حاجة على قبلو.. مستعد يدير المستحيل باش يوصل ليه.. حيت هو العام كلو وهو يتسنى هذيك اللحظة اللي غاياكل فيها الشوا ولحم الراس مبخر والتقلية والبروشيط.
المغربي سمع بقرار الداخلية مع السبعة دالعشية، لكن عوض ما يكَلس فدارو ويحمد الله، ومايسافرش من وفي اتجاه مجموعة من المدن اللي كتعتبر بؤر كورونية بامتياز، بحال طنجة ومراكش وكازا وفاس.. المغربي الصكَع ماتسوقش، لا لكورونا لا لغيرها، كيفكر غا فحاجة وحدة: "بولفاف".. أودي "موت وحدة كاينة والمهم هو الإنسان يموت شبعان".. وبتفكيرو هذا ناض بلا ما يشعر وبلا عكز عليه جمع قشو، وكاين اللي ماجمع والو مشا طويل، وهز ولادو، وشد الطريق.. الكائن المغربي بدا يتجارا ويتسابق باش يلحق بلاصة بولفاف بالشحمة والكتف مشوي قبل 12 دالليل، الساعة اللي غيتطبق فيها القرار.
كلشي مشارك فسباق "بولفاف"، حتى من كازا بدات تخوا من 6 دالعشية.. مع 8 الذبانة مابقات تزنزن فالسونتر فيل.. حيت كلشي مشارك في سباق محموم الجائزة ديالو هي "بولفاف".. وديجا لومبوطياج بدا فكازا من المدينة.. والكلاكسونات على الجهد فالطريق اللي كتدي للوطوروت فاتجاه مراكش.. واحد المشهد قيامي صافي.. بحال شي فيلم دالرعب !!
الناس ففيسبوك دايرين حالة، كلشي كينتقد فقرار الحكومة، وكلشي كيقوليك هذشي جا على غفلة، وكون غا علمونا على بكري حيت عيد الكبير بقات ليه غير 5 أيام، أودي يعلموك بكري باش تسافر على خاطرك وتنشر الفيروس فالمدن اللي مافيهاش ولا كيفاش؟ راه الأصل ماشي الجرا من قبل التناش دالليل ولا من بعدها، راه الأصل هو تكَلس فدارك منين تسمع هذ القرار، وماتكونش أناني، وتخلي فرصة للناس اللي مخيمين وبعاد على ديورهم هوما اللي يرجعو.. ماشي تتزاحم أنت والآلاف من اللي بحالك وتدير الكسايد وتنشر فالفيروسات باش تلحق تذبح وتسلخ وتشوي وتاكل وتعادي عائلتك ونوليو بحال ميريكان والهند والبرازيل..
عاد شي وحدين قاليك "كون غير لغاو عيد الكبير.." أودي معامن غاتلغي العيد مع هذ الناس اللي كيقدسوه لدرجة كبيرة بزاف.. وكيعتبروه ركن من أركان الإسلام واخا هو غير سنة مؤكدة.. كون تلغى كون راه ناضت روينة كثر من هذي.. وبنادم خرج يحتج فالزناقي.. ونفترضو كَاع الحكومة غلطات ومالغاتوش حتى نزلات على المواطنين بهذ القرار بحال الصاعقة، إيوا مايكونوش أنانيين عاوتاني.. و"راه لا يكلف الله نفسا إلى وسعها".. او إلى كانو كيعتبرو راسهم "عالقين" مانعرف عاوتاني.. سمعت بللي الأوكسيجين مامقطوعش.. غير شوية داللحم اللي عامر ذهون وكوليستيرول اللي غايتقطع.. او واقيلا حولي العيد عند هذ الناس ضرورة قصوى.. والله أعلم عاوتاني مال هذ الناس.. هداو عليا..