واخا الرحلات الجوية حابسة.. طيارة تابعة للخطوط المصرية هزات المصريين اللي حاصلين فالمغرب لبلادهم

اليوم أول رحلة استثنائية كتنظمها الحكومة المصرية باش ترجع المصريين اللي حاصلين فالمغرب من بعد ما تعلقات الرحلات الجوية والبحرية بسبب انتشار فيروس كورونا المستجد فالعالم، والطيارة مازالة لحد كتابة هذ الأسطر شادة طريقها.
وحسب مصادر "الكود"، الطيارة اللي من نوع إير-باس A320 251N وتابعة لشركة مصر للطيران هزات تقريبا 145 مصري من المطار الدولي ديال كازا مع الثلاثة دالعشية، باش تحطهم مع 8 ونص دالليل حسب التوقيت المصري فمطار مدينة مرسى علم، بمعنى أن الرحلة مازال مستمرة لحدود كتابة هذ الأسطر والمدة ديالها 3 دالساعات ونص.
وبمجرد وصول المصريين لبلادهم، غادي يديوهم مباشرة بعد نزولهم من مطار مرسى علم لجوج فنادق باش يديرو الحجر الصحي لمدة 14 ليوم قبل ما يمشيو عند عائلاتهم.
وكانت رئاسة مجلس الوزراء المصري وافقات على إطار عام لإجلاء المصريين اللي حاصلين فالمغرب، ورتبات بشكل دقيق لرحلة اليوم بالإضافة لمجموعة من الرحلات الأخرى اللي غادي تتكلف من خلالها بإرجاع المواطنين ديالها فمختلف بلدان العالم من 21 أبريل ل30 أبريل.
السفارة المصرية كانت حددات شروط العودة لمصر بالنسبة للمواطنين اللي حاصلين فالمغرب، من ضمنها يخلصو التذكرة اللي كدير تقريبا 650 دولار (6500 درهم)، واللي كتشمل كذلك مصاريف العودة من مدينة مرسى علم حتى لديورهم، وكذلك يخصو مدة 14 ليوم اللي غيدوزوها فلوطيل.
والرحلة الاستثنائية من المغرب لمصر ماهماتش كلشي، لكن فقط الناس اللي عندهم باصبور مصري، وجاو بصفة مؤقتة لغرض السياحة أو زيارة عمل قصيرة أو العلاج أو أن الأمر كيتعلق بطالب ماعندوش فين يسكل، كذلك الرحلة همات استثناءا المغاربة اللي مزوجين وعندهم جنسية مصرية وكيسكنو فمصر.