ليكونوميست: كثر من النص ديال المغاربة ماراضيينش على تسيير حكومة بنعرفة لجايحة كورونا

دارت جريدة "ليكونوميست" بشراكة مع مؤسسة "سونجيريا" استطلاع رأي نشراتو الحريدة فعدد لبارح الجمعة، كتقول فيه أن 51 فالمية من المستجوبين فهذ الاستطلاع شافو بأنهم ماراضيينش على تسيير حكومة بنعرفة بسبب القرارات السيئة اللي تخادت مللي بدا الوباء.
وغير 10 فالمية اللي بينو على ثقتهم فتدبير رئيس الحكومة بنعرفة لجائحة كورونا، بينما 20 فالمية من ثلثي المستجوبين انتقدو بشدة التدبير ديالو، و45 شافو بأن هذ التدبير سلبي كثر مللي هو إيجابي.
وختلفات الأسباب علاش المغاربة ماحاملينش التدبير الحكومي ديال الجايحة، بحيث 14 فالمية كيقولو بسبب غياب الإجراءات الاحترازية الفعالة لمكافحة الفيروس، و13 فالمية بسبب قلة التواصل، و8 فالمية بسبب التأخر فاتخاذ هذ القرارات، و3 فالمية لأسباب خرى.
بالنسبة لرأي المغاربة فالتدابير الحكومية فهذ الجايحة حسب المنطقة فين عايشيين، ف72 فالمية من سكان الجهة الشمالية والشرقية غير راضين على هذ الإجراءات، مقابل 8 فالمية دالناس اللي راضيين، بينما بين الاستطلاع أن الجهات اللي منتشر فيها كورونا كثر هي اللي منتقداتش بزاف التدابير الحكومية.
وبين الاستطلاع أن منسوب ثقة المواطنين فالحكومة غادي وكينزل، واخا كانو ثايقين فيها بشكل كبير فبداية الوباء.