المواجهة بين عمر الراضي والمشتكية بيه سالات بعد 7 دالسوايع متابعة.. والمحامي قنديل ل"كود": القاضي حدد 5 نونبر للاستماع للشهود وقبل غايجيب عماد ستيتو.. وباه: عمر كان مقتنع بتدخل الدفاع ومآمن بقضيتو

استمرات المواجهة بين الصحافي عمر الراضي والمشتكية بيه حفصة بوطاهر اللي كتتهمو باغتصابها، شي 7 ساعات ديال الوقت تقريبا، عند قاضي التحقيق فالجلسة الثالثة ديال التحقيق التفصيلي فالقضية، فمحكمة الاستئناف فكازا.
وفتصريحو ل"كود" قال محامي الراضي، ميلود قنديل، أن القاضي حدد جلسة 5 نونبر للاستماع للشهود، وقبل منها غتكون جلسة للاستماع للصحافي عماد ستيتو، اللي توجهات ليه تهمة المشاركة فالاعتداء الجنسي على بوطاهر، باش يدلي بالأقوال ديالو فالموضوع.
وقال قنديل أن كل واحد فالجلسة تشبت بالكلام ديالو، بحيث الراضي مصر على ان علاقتو مع بوطاهر كانت رضائية، بينما هي كتأكد أنه تعدى عليها جنسيا، وكل واحد فيهم كيحاول يبرر قولو بحجج وإثباتات باعتماد الدفاع.
وكشف قندير أن الراضي آزروه فهذ الجلسة 12 محامي من مختلف مدن المغرب، من بينهم النقيب عبد الرحمن بنعمرو، بينما بوطاهر دافعو عليها غير جوج محامين فقط، وهوما فاطمة الزهراء الابراهيمي عبد الكريم أمليح.
من جهتو قال ادريس الراضي، والد عمر الراضي، فتصريح مقتضب ل"كود"، أن ولدو مآمن بقضيتو وبراءتو، وواثق بشكل كبير فتدخل الدفاع.
والراضي مشدود من 29 يوليوز بسبب تهم "المس بسلامة الدولة" و"التخابر مع عملاء أجانب"، بالإضافة لتهمة "الاغتصاب" اللي كيتم التحقيق معاه فيها تفصيليا.