الودادية الحسنية للقضاة. تعطلات باش دير بلاغ على الكركرات وعوض تاخد مسافة مع قضية امام القضاة كتهاجم الصحافة. راه كان خاص استقالة كاع للي تجبد اسمهم فعصابة النصب باسم الصحافة حتى يسالي التحقيق

الودادية الحسنية للقضاة زگلات مناسبة باش تدافع على القانون. البارح دار مكتبها المركزي اجتماع فكازا وخرج بلاغ غادي يبقى للتاريخ.
اولا قاليك تثمن مبادرة فتح معبر الگرگرات. راكم تعطلتو بزاف. اييه كان تخرجو بيان قبل ماشي حتى اليوم.
ثم ديرو بيان فيه تثمين لهاد الفتح ديال الكركرات وتهاجمو الصحافة راه خطأ.
قبل ما نبينو علاش خطأ نشيرو باللي قضاة فالودادية كان خاصها تجنب عبارة "مرتزقة" على وصف البوليساريو. انتوما فيكم اللي كيسهر علو حماية حقوق لمغاربة ودعم دولة الحق والقانون. خاص تجنب هاد الاوصاف. راه الدولة المغربية كتفاوض معاهم. دابا ايلى وقف شي عضو منهم قدام العدالة فالصحرا واش غادي يحس بالعدل وانتوما كتوظفو هاد العبارة؟ كان ممكن توصيفات اخرى دعمو فيها مغربية الصحراء بذكاء
ثم هاد البيان اللي فيه الكركرات واصابة قضية عصابة الابتزاز باسم الصحافة راه خطير واستغلال ما كانش خاصو يكون.
كتبتو باللي كتشجبو ودينو محتوى بعض المقالات والفيديوهات المنشورة الكترونيا واللي كتسيء للودادية وهددتو بمتابعة ماليها قانونيا. يعني من اصل 4 نقاط فالبيان جوج لهاد القضية
اولا ما خديتو حتى موقف من ظهور قضاة منهم قياديين فالودادية فمحضر عصابة الابتزاز باسم الصحافة. علاش ما تقولوش باللي في اطار الدفاع عن قضاء نزيه تقرر تعليق عضوية كاع اللي بانو فالمحاضر فالودادية. راه وزير او قاضي فالغرب غير كيبان اسمو كيستاقل باش يدافع على راسو ماشي كيجي كيكتب البيانات.
دابا حتى الاستماع لهاد القضاة مازال ما دارتش. راه التهم خطيرة بزاف اللي موجهة لبعض القضاة، علاش ما خداتش الودادية مسافة مع هاد القضية ومخرجة بيان كيهاجم الصحافة
ثم علاش الاجهزة للي معنية بالصحافة خدات مسافة ومخلية القضاء يدير خدمتو. واش هما تايقين فيه وانتوما اللا؟ غير قولو اش واقع
هادا بيان خطأ فالتوقيت الخطأ. تسناو حتى يحسم القضاء وديرو اللي بغيتو