قبل ما تقنن الدولة إستهلاك الحشيش والتجارة فيه خاص تقدم إعتذار رسمي لأي واحد سبقليه تشد على الحشيش أو الكيف وعلاش لا تدير ليهم شي هيئة ديال الإنصاف والمصالحة ويشدو تعويضات على السنوات لي دوزو في الحبس

مجلس النواب الأمريكي وافق على قانون يلغي تجريم القنب الهندي، هاد القانون الى داز من مجلس الشيوخ غادي يلغي تجريم حيازة القنب الهندي، ميريكان كتزرع الماريخوانا في كاليفورنيا بشكل قانوني وغادا دابا وكتلغي تجريم الحيازة ديالها وتقنين استهلاكها في كاع البلاد، حيت لقاو أن الحرب على القنب الهندي بإعتباره مخدر قوي مكلفة وعندها ضحايا كثار، ناس عاديين ماشي مجرمين تدمرات حياتهم غير حيت تشدو هازين الماريخوانا، وشافو أن تجريم تعاطي هاد النبتات تسبب في كوارث حقيقية على المجتمع، ولي غادي يقدر يعالجها التقنين والضرائب لي غادا تفرض عليه ويستافدو منها الولايات باش يصرفو على نظام غعادة التأهيل في السجون.
بينما في المغرب البلد المنتج منذ قرون خلت، كل مرة تقرى في المواقع إعتقال تاجر مخدرات على متن سيارة هاز معاه جوج خناشي ديال الكيف، كان كيكميهم القايد العيادي والخليفة حمد غير بوحدهم في شهر، ويصوروه ويخرج بيان ويبان فالجورنال والسيد غير كيبيع الكيف فشسي عروبية سرحو فيه الجدارمية لعيا جايب جوج خنشات ديال الكيف أو حتى كثر بعاد على فين كيتزرعو ب ميتين كلم أو قل، وحتى هو كيسيفطوه للحبس يدوز عامين وتلاتة ويشردو أسرة، ضحايا تجريم الحشيش في المغرب راهم بالآلاف وقبل ما تقنن الدولة إستهلاك الحشيش والتجارة فيه خاص تقدم إعتذار رسمي لأي واحد سبقليه تشد على الحشيش أو الكيف وعلاش لا تدير ليهم شي هيئة ديال الإنصاف والمصالحة ويشدو تعويضات على السنوات لي دوزو في الحبس وهوما مساكن كانو هازين غير منتوج فلاحي مغربي بحال النعناع وقزبر ومعدنوس و الحرمل.
هكتارات ديال الكيف كتزرع كل عام وأطنان ديال الحشيش كتخرج منها، شي كيتستهلك هنا وأطنان كتصدر بمختلف الطرق، هاد الطرق لي كتدخل الملايير على العصابات والفاسدين، في المقابل مواطن مغربي هاز معاه بلاكة وباغي يتعاون على الزمان مفرتكها ربوعة وكالس يدوز غير لصحابو إلى تشد كيتحكم عليه بتجارة المخدرات بحالو بحال الشريف بلويدان، أو واحد من شي دوار جايب خنشة ديال الكيف يفرقها مشامم فوق شي ياماها خمسين غير وسط لخلا، حتى تلقى الجوندارم شادينو ومسيفطينو الحبس ومخدمين معاهم النص في البلاد، راه معرفتش آش كنتسناو حتى يتم القطع مع هادشي ويتقنن الحشيش وندخلو حتى حنا لقائمة الدول المتحضرة لي كتعرف مصلحة مواطنيها وكتحتارمهم.